سوشل میڈیا کا 'غلط استعمال' کرنے پر ٹیچر گرفتار

گزشتہ مہینوں میں حکومت یا سیکیورٹی مخالف مواد شیئر کرنے پر متعدد افراد کے خلاف کاروائی کی گئی۔

جموں و کشمیر پولیس کے سائبر سیل نے سوشل میڈیا کا غلط استعمال کرنے والوں کے خلاف کاروائی تیز کرتے ہوئے شمالی کشمیر میں محمکہ تعلیم سے وابستہ ایک ٹیچر کی گرفتاری عمل میں لائی ہے۔

اطلاعات کے مطابق سائبر پولیس نے کاروائی کرتے ہوئے سوپور کے ایک استاد کو سوشل میڈیا کا غلط استعمال کرنے کی پاداش میں گرفتار کیا ہے جس کی شناخت طاہر نذیر شالہ ولد نذیر احمد شالہ کے طور ہوئی ہے۔

گرفتار شدہ شخص کو سوپور کے پولیس اسٹیشن میں زیر حراست رکھا گیا ہے۔

پولیس نے اپنے بیان میں واضح نہیں کیا ہے کہ مزکورہ شخص نے کس طرح کا سوشل میڈیا کا غلط استعمال کیا ہے۔ تاہم گزشتہ مہینوں میں حکومت یا سیکیورٹی مخالف مواد شیئر کرنے پر متعدد افراد کے خلاف کاروائی کی گئی۔

مزید تحقیقات جاری ہے۔