بانڈی پورہ: محکمۂ دیہی ترقی کے ملازمین ڈیوٹی سے غیر حاضر

شمالی کشمیر کے ضلع بانڈی پورہ کے نوگام سوناواری علاقے میں لوگوں نے شکایت کی ہے کہ یہاں محکمہ دیہی ترقی میں موجود ملازمین اکثر ڈیوٹی سے غیر حاضر رہتے ہیں جس کی وجہ سے یہاں کے عوام کو کافی مشکلات کا سامنا کرنا پڑتا ہے۔

ای ٹی وی بھارت نے جب اس سلسلے میں بلاک ڈویلپمنٹ ڈیپارٹمنٹ کا معائنہ کیا تو وہاں صرف 3 ملازمین موجود تھے جب کہ یہاں دس افراد پر مشتمل اسٹاف تعینات ہے۔

دفتر کے آس پاس موجود کئی مقامی لوگوں نے بتایا کہ اکثر ملازمین کی غیر موجودگی سے ان کے کام کافی حد تک متاثر ہوئے ہیں-

ایک شخص نے سوال اٹھاتے ہوئے کہا کہ اگر ملازمین 30 سے 50 ہزار تک تنخواہیں حکومت سے وصول کرتے ہیں تو وہ اپنے پیشے کے ساتھ کیوں انصاف نہیں کررہے ہیں-
ادھر ای ٹی وی بھارت نے جب اس مسئلے پر متعلقہ بلاک ڈیولپمنٹ افسر ہدایت احمد سے رابطہ کیا تو انہوں نے یقین دہانی کرائی کہ وہ اس معاملے میں ایکشن لیں گے اور غیر حاضر ملازمین کے خلاف ایک جواب طلبی نوٹس نکالیں گے-