تسلیمہ نسرین کی مخالفت معاملے میں سیشن کورٹ نے امتیاز جلیل کو بری کیا

متنازع مصنفہ تسلیمہ نسرین کی اورنگ آباد آمد پر مخالفت معاملے میں اورنگ آباد کی سیشن کورٹ نے ایم پی امتیاز جلیل کو باعزت بری کیا۔ ایم آئی ایم کی مخالفت کے سبب تسلیمہ نسرین کو اورنگ آباد ائیر پورٹ سے واپس جانا پڑا تھا۔

متنازع قلمکار تسلیمہ نسرین کی اورنگ آباد آمد کی پرزور مخالفت کے معاملے میں اورنگ آباد کی سیشن کورٹ نے ایم پی امتیاز جلیل سمیت تمام ملزمین کو بری کردیا ہے۔ یہ فیصلہ اورنگ آباد کی ڈسٹرکٹ سیشن کورٹ نے سنایا۔

واضح رہے جولائی 2017 میں متنازعہ مصنفہ تسلیمہ نسرین کو ایک پروگرام میں شرکت کی غرض سے اورنگ آباد مدعو کیا گیا تھا۔ اس وقت ایم آئی ایم نے متنازعہ مصنفہ کی آمد کی پرزور مخالفت کی تھی جس کے نتیجے میں تسلیمہ نسرین کو ائیر پورٹ سے ہی واپس جانا پڑا تھا۔

اس معاملے میں اورنگ آباد کے ایم آئی ڈی سی سڈکو پولیس اسٹیشن میں اس وقت کے ایم ایل اے سید امتیاز جلیل اور ان کے ساتھیوں کے خلاف مقدمہ درج کیا گیا تھا۔ آج سیشن کورٹ میں معاملے کی سنوائی ہوئی اور عدالت نے ثبوتوں کو ناکافی بتاتے ہوئے تمام ملزمین کو بری کردیا۔

ایم پی امتیاز جلیل نے عدالت کے فیصلے پر اطمینان کا اظہار کیا ہے۔