مکمل لاک ڈاؤن کے دوران میونسپل اداروں و دیگر محکموں کے اشتراک سے سینیٹائزیشن کا عمل جاری ہے اور لوگوں کو گھروں میں رہنے اور کورونا وائرس کے اثرات سے بچنے کےلئے لاک ڈاؤن کی پاسداری کی ہدایت دی جا رہی ہے۔
میونسپل کونسل اننت ناگ کے صدر ہلال احمد شاہ کی قیادت میں رحمت عالم ہسپتال و دیگر ملحقہ علاقوں کو آج مکمل طور پر سینیٹائز کیا گیا۔
بعد ازاں ہلال شاہ نے قصبہ اننت ناگ سمیت دیگر علاقوں کا دورہ کیا اور لاک ڈاؤن کی عمل آوری کا جائزہ لیا۔ انہوں نے لوگوں سے اپیل کی کہ وہ سرکاری احکامات کی پاسداری کریں۔
ہلال شاہ کے مطابق ابھی تک لاک ڈاؤن کی خلاف ورزیوں کے پاداش میں سینکڑوں کاروائیاں عمل میں لائی گئی ہیں۔
واضح رہے کہ رحمت عالم ہسپتال میں اس وقت سی آر پی ایف مقیم ہے تاہم عوام نے انتظامیہ سے اپیل کی ہے کہ ہسپتال کو عوام کی خدمت میں بروئے کار لایا جائے۔
