اننت ناگ میونسپل کونسل کی جانب سے ضلع اننت ناگ کے اشاجی پورہ میں تعمیر کیے گئے میرج ہال کو آج سے عوام کے لیے وقف کر دیا گیا ہے۔ میریج ہال کو 68 لاکھ کی لاگت سے تعمیر کیا گیا ہے اور یہ قصبہ اننت ناگ میں اپنی نوعیت کا پہلا میریج ہال ہے۔
گزشتہ برس پرنسپل سکریٹری شیلندر کمار کابرا نے ضلع ترقیاتی کمشنر اننت ناگ اور میونسپل کونسل اننت ناگ کے چیئرمین ہلال احمد شاہ کے ہمراہ میریج ہال کا افتتاح کیا تھا۔ جمعہ کے روز پہلی بُکنگ کے ساتھ ہی میریج ہال کو با ضابطہ طور پر عوام کے لئے وقف کیا گیا۔
میونسپل کونسل کے چیئرمین ہلال احمد شاہ نے کہا کہ میریج ہال کو تمام ضروری سہولیات سے لیس کیا گیا ہے، تاکہ لوگ اس سے استفادہ کر سکیں۔ انہوں نے کہا کہ آنے والے وقت میں انتظامیہ کی جانب سے ایک اور بڑے میریج ہال کا قیام عمل میں لایا جائے گا۔ شاہ نے ضرورت مند لوگوں سے اپیل کی کہ وہ بکنگ کے لئے میونسپل کونسل کا رخ کریں۔