دو خواتین سمیت ایک خاندان کے تین افراد کے خلاف مقدمہ

کورونا وائرس کی بیماری کے پیش نظرایک جانب جہاں جرائم کی شرح کم ہوئی تھی وہیں اس بیماری کے دوران جاری لاک ڈاؤن کے تقریباً ختم ہونے کے فوری بعد ممبئی پولیس کے اقتصادی سیل نے کروڑوں روپے کی جعلسازی کے معاملے میں ایک خاندان کے تین افراد کے خلاف مقدمہ درج کیا ہے جس میں دوخواتین بھی شامل ہیں۔

ممبئی پولیس کا اقتصادی سیل ہر ماہ تقریباً۱۰۰؍سے زائد جعلسازی کے معاملات کااندراج کرتاہے جس میں ۳۰۰؍کروڑ روپے کی مالیت سے زائد کے معاملات شامل ہیں ۔

متذکرہ معاملہ کےمطابق شہر کے ایک چارٹرڈاکاؤنٹنٹ اوردیگر ۳۴؍افراد نے ایک مالیاتی کمپنی کے خلاف شکایت درج کرائی تھی جس کے مطابق شکایت کنندگان نے نجی کمپنی جے ایس کے مارکیٹنگ میں سرمایہ کاری کی تھی اورملزمین نے سرمایہ کاروں سے یہ وعدہ کیا تھا کہ وہ ان کے سرمایہ کے عوض میں انھیں ماہانہ ۲۰؍فیصد سود اداکریں گے نیزآن لائن شاپنگ کی ایک عالمی تجارتی کمپنی میں ان کاسرمایہ لگایا جارہا ہے ۔

چارٹرڈ اکاؤنٹنٹ سنجے مالونے اپنی شکایت میں مزید کہاہے کہ سرمایہ کاری کے بعد جب انھیں کمپنی کی جانب سے کوئی منافع کی یا سود کی رقم ادا نہیں کی گئی تب انھوں نے تہہ تک جاکراس معاملے کی خود سے تفتیش کی جس پر انھیں یہ پتہ چلاکہ ملزمین نے جی ایس ٹی کی ادائیگی کے معاملے میں فرضی بل سرکاری محکموں میں جمع کئے تھے جس کے سبب ان کے خلاف معاملہ درج کیا گیا تھا۔

شکایت کے مطابق سرمایہ کاروں نے یہ بھی پتہ لگایا کہ ملزمین نے ان کی رقوم سے اپنی ذاتی جائیدادیں خریدی ہیں ۔

شکایت کنندہ نے اس ضمن میں پولیس کو وہ دستاویزات بھی پیش کئے جس سے یہ ثابت ہوتاہے کہ ملزمین نے نہ صرف سرمایہ کاروں سے دھوکہ دہی کی ہے بلکہ ان کے سرمایہ سے کروڑوں کی مالیت کی جائیدادیں بھی خریدی ہیں۔

اقتصادی سیل کے ایک افسر کے مطابق تفتیش کا کام جاری ہے اورجلد ہی ملزمین کی گرفتاری متوقع ہے ۔