گھروں میں رہ کر عبادت کریں: خادم خاص حضرت شاہ عالم درگاہ کی اپیل

احمد آباد میں واقع مشہور درگاہ 'حضرت شاہ عالم درگاہ' کے خادم خاص نے رمضان المبارک کے موقعے پر عوام سے گھروں میں رہ کر عبادت کرنے کی اپیل کی ہے۔

عام دنوں میں حضرت شاہ عالم درگاہ پر عقیدت مندوں کا اژدہام دیکھنے کو ملتا تھا خصوصاً رمضان المبارک کے موقعے پر روزے داروں اور عقیدت مندوں کا ہجوم لگا رہتا تھا، لیکن کورونا وائرس کی وجہ سے درگاہ میں بھی سناٹا چھایا ہوا ہے۔ درگاہ انتظامیہ نے زیارت سمیت درگاہ میں داخلے پر پابندی عائد کردی ہے۔

انتظامیہ نے سماجی دوری کا خیال رکھتے ہوئے درگاہ میں سحر و افطارکے انتظام کو بھی بند کرنے کا فیصلہ کیا ہے۔

اس سلسلے میں درگاپ کے خادم خاص صوبہ خان پٹھان نے ایک ویڈیو پیغام جاری کرکے لوگوں کو گھروں میں رہنے کی اپیل کی ہے۔'

انہوں نے کہا کہ' رمضان کا اہتمام کرنا ہمارا فریضہ ہے لیکن ساتھ ہی اپنی صحت کا خیال رکھتے ہوئے گھروں میں رہ کر عبادت کرنا بھی ہمارا فریضہ ہے۔ انہوں نے نماز تروایح بھی گھروں میں ادا کرنے کی اپیل کی ہے۔ اور عوام سے دعائیں کرنے کی اپیل کی ہے۔