احمدآباد کے جمال پور علاقے میں موجود ایف ڈی ادارے کی جانب سے چلنے والے اسکولوں میں پرائمری سے لے کر ایم اے تک کی تعلیم دی جاتی ہے۔ جہاں ہزاروں کی تعداد میں ہر روز طلبہ تعلیم حاصل کرنے پہنچتے ہیں لیکن لاک ڈاؤن کی وجہ سے اسکولز ابھی بند ہیں۔
اس سال بچوں کی تعلیم پر گہرا اثر ہوا ہے۔ اب جب 8 جون سے گجرات میں اسکولز کھل گئے ہیں تب بھی اسکول میں طلبہ کو جانے کی اجازت نہیں دی گئی ہے۔ وزیر تعلیم کے بیان کے مطابق شاید 15 اگست کے بعد اسکولوں میں طلبہ نظر آئیں گے۔ ایسے میں اسکولوں میں اساتذہ حاضر ہو رہے ہیں اور طلبہ کی آمد کے لیے تیاریاں کررہے ہیں۔
اس تعلق سے ایف ڈی ہائی اسکول کی پرنسپل انیسہ شیخ نے کہا کہ طلبہ کے بغیر اسکول ویران ہے، طلبہ سے ہی اسکول کی رونق ہوتی ہے لیکن فی الحال اسکولوں میں طلبہ کو آنے اجازت نہیں ہے کیونکہ کورونا وائرس پھیلا ہوا ہے، ہم پوری تیاری کر رہے ہیں کہ اسکول میں بچوں کے آنے پر کیا کچھ انتظامات کیے جائیں گے۔
انہوں نے بتایا کہ ہم تمام طلبہ کو کتابیں ان کے گھر پہنچا رہے ہیں۔ آن لائن کلاسز بھی شروع کردی ہے، اسکول میں نششت کا بھی انتظام کیا جائے گا، طلبہ کو فاصلوں کے ساتھ بٹھانے کا انتظام کیا جارہا ہے اور جو بھی سرکاری گائیڈ لائنز ہوں گی اس پر عمل کرتے ہوئے تعلیمی سرگرمیاں شروع کی جائیں گی۔ تاہم اسکول کے اساتذہ بھی پوری طرح بچوں کو پڑھانے کی منصوبہ بندی کر رہے ہیں۔
