فلپ کارٹ اور ایکسس بینک کی مشترکہ کریڈیٹ کارڈ سہولت

ماسٹر کارڈ کی سرپرستی میں ای۔کامرس کی دنیا کا بڑا نام فلپ کارٹ اور ایکسس بینک کی جانب سے مشترکہ کریڈیٹ کارڈ جاری کیا گیا ہے۔ اس سہولت کو آن لائن خریداری کے ضمن میں اہم پیش رفت قرار دیا جارہا ہے۔

ایکسس بینک میں ادائیگی اور کریڈیٹز کے ایکزیکیٹیو نائب صدر سنجیو موگھے نے میڈیا کو بتایا کہ ' اس نئے اقدام کے تحت فلپ کارڈ سے اشتراک کے ساتھ رقم کی تیز تر منتقلی کے لیے کریڈیٹ کارڈز جاری کر رہے ہیں۔ ہمارا مقصد ہے کہ اگلے ایک برس میں دس لاکھ گاہکوں تک کریڈیٹ کارڈ کی سہولت مہیا کرانا ہے۔ بینک اس سے پہلے 6.17 ملین کارڈ جاری کرچکی ہے۔'

ایکسس بینک اب تک 6.17 ملین اے ٹی ایم کارڈ جاری کرچکی ہے

سنجیو موگھے کے مطابق فلپ کارٹ۔ ایکسس بینک کا مشترکہ کریڈیٹ کارڈ حاصل کرنے کے لیے جوائننگ فیس 500 روپیے اور سالانہ 500 روپیے ادا کرنا ہوگا۔ یہ دو لاکھ قرض کی سہولت تک محدود ہے۔

فلپ کارٹ آن لائن خریداری کا بڑا مرکز

انھوں نے کہا کہ اس نئے کارڈ کے ذریعے آن لائن خریداری پر ڈیڑھ فیصد کا کیش بیک دیا جائے گا۔ اسی طرح کثیر تعداد میں خریداری (مرچنٹ شاپنگ) پر پانچ فیصد تک کیش بیک کی چھوٹ دی جائے گی۔

ایکسس بینک کے مینیجینگ ڈائریکٹر اور چیف ایکزیکیٹیو امیتابھ چودھری نے کہا کہ ' ہم ادائیگی کے معاملات میں بغیر کسی سمجھوتے کے، نقصان کو کم سے کم کرنے کی کوشش میں مسلسل لگے ہوئے ہیں۔'

واضح رہے کہ ایکسس بینک کو ملک میں اے ٹی ایم کارڈ جاری کرنے پر چوتھا درجہ حاصل ہے۔