شنگھائی (چین) میں اکتوبر 2022 میں ہونے والی ورلڈ اسکل چمپیئن شپ کے لیے ریاست کے نوجوانوں کو تیار کیا جارہا ہے، جس کے لیے ریاست میں منعقد ہونے والے مقابلوں میں نوجوان جوش وخروش سے شریک ہورہے ہیں۔ ان مقابلوں میں ابھی تک 20 ہزار90 نوجوان حصہ لے چکے ہیں۔ اضلاع و ڈیویژن سطح پر ہونے والے ان مقابلوں کے بعد اب ریاستی سطح کے مقابلے کا انعقاد ہورہا ہے جس میں 263/ امیدوار حصہ لے رہے ہیں۔ نوجوانوں میں جدت وکاروباری صلاحیت کو فروغ دینے والا انڈین اسکل مہاراشٹر 2021 سب سے بڑی اسکل کمپٹیشن ہے جو ریاستی سطح پر 3سے 5ستمبر کے درمیان منعقد کیا جائے گا۔ یہ اطلاع آج مہاراشٹرا کے محکمہ اسکل ڈیویلپمنٹ کے وزیر نواب ملک نے دی ہے۔
نواب ملک نے بتایا کہ پرنٹ میڈیا ٹیکنالوجی، لینڈاسکیپ گارڈننگ، انڈسٹریل کنٹرول، ایئرکرافٹ مینٹننس، آئی ٹی، ایگریکلچر اور فلوریسٹری جیسے اسکل پیشوں میں ان مقابلوں کا انعقاد کیا گیا ہے۔ مہاراشٹر اسکل چیمئن شپ کا آخری مقابلہ 45/ اسکل زمرے میں 3سے5ستمبر کے درمیان ریاست کے مختلف مقامات پر منعقد کئے جائیں گے۔ انہوں نے کہا کہ ریاستی سطح کے مقابلوں کا افتتاح جمعہ 3ستمبر کو دوپہر 3بجے کرلا، ممبئی میں واقع ڈان باسکو انڈسٹریل ٹریننگ انسٹی ٹیوٹ میں کیا جائے گا۔ جبکہ اتوار 5 ستمبر کو شام 3 بجے لوور پریل، ممبئی میں آئی ایس ایم ای اسکول آف مینجمنٹ اینڈ انٹرپرونیورشپ میں اختتامی پروگرام کا انعقاد کیا جائے گا۔ اس پروگرام میں ریاستی سطح کے چیمئنس کو نقد انعام اور سرٹیفکٹ دے کر ان کا اعزاز بھی کیا جائے گا۔