اس مشین کے آنے سے علاج ومعاملہ میں مزید بہتری آنے کی امید ہے۔ ساتھ ہی زیادہ مریضوں کے ایکسرے بھی کئے جا سکیں گے۔
بارہ بنکی کے رفیع احمد قدوائی میموریل ضلع ہسپتال میں طویل انتظار اور تمام تر جدوجہد کے بعد ڈیجیٹل ایکسرے مشین کا آغاز ہو گیا ہے۔ ڈیجیٹل ایکسرے مشین سے ہسپتال کے مریضوں کو کئی طرح سے فائدہ ہوگا۔
ڈیجیٹل ایکسرے مشین سے جسم کے اندر کی بیماریوں کو پرانی مشین کے مقابلہ کئی گنا بہتر ڈھنگ سے دیکھا اور سمجھا جا سکے گا۔ جس سے ضلع کے عوام خاص کر غریبوں کو کافی فائدہ ہوگا۔
بارہ بنکی ضلع ہسپتال کی ڈیجیٹل ایکسرے مشین اب تک کی سب سے جدید ٹیکنالوجی والی مشین ہے۔ شہر کے پرائیویٹ کسی بھی پیتھولوجسٹ کے پاس ایسی مشین نہیں ہے۔ اس مشین کے لگنے سے ہسپتال میں زیادہ ایکسرے کئے جا سکیں گے۔ خاص بات یہ ہے کہ یہ عوام کے لئے بالکل مفت ہے۔
اتنی خاصیت اور اتنے دعووں کے باوجود ڈیجیٹل ایکسرے مشین کی کامیابی ہسپتال ملازمیں کے کام کرنے کے طریقے پر منحصر ہے۔ لوگوں کو خدشہ ہے کہ ہسپتال انتظامیہ کی عدم توجہی کی وجہ سے ڈیجیٹل ایکسرے مشین کا بھی وہی حال ہوگا، جو ہسپتال کی دیگر سہولیات کا ہے۔
