امریکہ نے انٹیلی جنس افسر سے پابندی ہٹائی

امریکہ نے وینزویلا کے سابق ٹاپ انٹیلی جنس سروس سیکشن کے سابق سربراہ جنرل پر عائد تمام پابندیوں کو ہٹانے کا اعلان کیا ہے۔

امریکہ نے وینزویلا کے موجودہ صدر نکولس مادرو کے خلاف بغاوت کرکے حزب اختلاف کے رہنما جوآن گوائیڈو کی حمایت میں آنے والے انٹیلی جنس سروس سیکشن کے سابق سربراہ جنرل مینوول کرسٹوفر فیگویرا پر عائد تمام پابندیاں ہٹالی ہیں۔

خیال رہے کہ امریکہ کے نائب صدر مائیک پینس نے وزارت خارجہ میں منعقد 'واشنگٹن کانفرنس' میں یہ اطلاع دی۔

نائب صدر پینس نے کہا 'جمہوریت اور قانون کی حکمرانی کی حمایت کرنے کے لیے ان کی حالیہ کارروائیوں کو تسلیم کرتے ہوئے، میں آج اعلان کررہا ہوں کہ امریکہ فوری اثر سے جنرل مینوول کرسٹوفر فیگویرا پر عائد تمام پابندیوں کو ختم رہا ہے'۔

اپوزیشن رہنما گوائیڈو نے گزشتہ ہفتے كراكس لا كارلوٹا فوجی ایئر پورٹ سے ایک احتجاج کی قیادت کرتے ہوئے وینزویلا کی فوج اور لوگوں سے سڑکوں پر اتر کر موجودہ صدر مادرو کو اقتدار سے بے دخل کرنے کا اعلان کیا تھا۔

وینزویلا میں موجودہ صدر نکولس مادرو کے خلاف ہو رہے احتجاجی مظاہروں کو دیکھتے ہوئے امریکہ نے اس پر کئی قسم کی پابندی لگانے کے علاوہ کہا ہے کہ وہ فوجی آپشن پر غور کر رہا ہے۔

قومی اسمبلی کے صدر اور حزب اختلاف کے رہنما گوائیڈو نے 23 جنوری کو ان احتجاجی مظاہروں کی قیادت کرنے کے ساتھ ساتھ خود کو ملک کا عبوری صدر قرار دیا تھا۔

امریکہ کے علاوہ اب تک کینیڈا، ارجنٹائنا، برازیل، چلی، کولمبیا، کوسٹا ریکا، گوئٹے مالا، ہونڈوراس، پنامہ، پیراگوئے اور پیرو سمیت 54 ممالک نے حزب اختلاف کے رہنما جوآن گوائیڈو کو وینزویلا کے عبوری صدر کے طور پر تسلیم کرنے کا اعلان کیا ہے۔

خیال رہے کہ وینزویلا میں ہزاروں لوگ موجودہ صدر نکولس مادرو کے خلاف احتجاج کر رہے ہیں، جبکہ ان احتجاجی مظاہروں کی قیادت گوائیڈو کر رہے ہیں۔

جنوری کے آغاز میں مادرو نے صدر کے طور پر ان کی دوسری مدت کا حلف لیا تھا، جبکہ مادرو پر انتخابی نتائج میں گڑبڑی کرنے کے الزام لگے تھے۔

مادرو کی قیادت میں کئی برسوں سے وینزویلا شدید اقتصادی بحران کا سامنا کر رہا ہے، وینزویلا میں بڑھتی ہوئی قیمتوں کے علاوہ کھانے پینے اور دواؤں کی کمی کی وجہ سےلاکھوں لوگوں نے وینزویلا سے فرارکا راستہ اختیار کیا ہے۔

اقوام متحدہ کے اعدادوشمار کے مطابق وینزویلا کے 27 لاکھ لوگوں نے لاطینی امریکی اور کیریبین ممالک میں پناہ لے رکھی ہے۔

موجودہ صدر مادرو نے گوائیڈو پر امریکہ کی مدد سے انہیں اقتدار سے باہر کرنے کی سازش کا الزام لگایا ہے، حالانکہ مادرو کو چین اور روس کھل کر اپنی حمایت دے رہے ہیں۔