ریاست راجستھان کے شہر اجمیر میں درگاہ کے ایک خادم سلیم الدین چشتی کے خلاف اس کی بیوی نے الزام لگایا کہ تین طلاق دے کر گھر سے بے دخل کر دیا اور ساتھ ہی یہ بھی الزام لگایا ہے کہ اس کے شوہر نے اسے پھنسا کر شادی کی اور یہ بات چھپائے رکھی کہ اس کی پہلے سے پانچ بیویاں ہیں۔
متأثرہ نے بتایا کہ شادی کے بعد سے شوہر نے ذہنی طور پریشان کرنا شروع کر دیا تھا، اکثر مار پیٹ کرتا۔ جبکہ اس سے قبل یہ وعدہ کیا تھا کہ شادی کے بعد الگ سے ذاتی مکان میں رکھے گا اور درگاہ کا خادم اسے بھی بنوائیگا، لیکن کرائے کے مکان میں اسے رکھا۔
ان ساری اذیتوں سے تنگ آکر آج اس نے درگاہ پولیس اسٹیشن کا رخ کیا۔ اور شوہر کے خلاف ایک رپورٹ درج کروائی ہے جس میں خاتون نے بتایا ہے کہ اس کے شوہر نے اسکے ساتھ مارپیٹ کی اور طلاق کہتے ہوئے اسے گھر سے باہر کردیا, درگاہ پولیس اسٹیشن نے مرکزی حکومت کے طلاق کے نئے قانون کے تحت مقدمہ درج کر لیا ہے اور تحقیقات شروع کر دی ہے۔
متأثرہ نے مزید بتایا کہ اس کا شوہر اس سے قبل بھی فون پر کئی مرتبہ طلاق دے چکا ہے۔ ساتھ ہی پولیس اہلکار پر بھی الزام لگایا کہ پولیس والے خادم سے رشوت لے کر اس کی رپورٹ درج نہیں کر رہے تھے، لیکن اس بار اعلیٰ افسر سے میں نے درخواست کی ہے، مجھے یقین ہے کہ مجھے انصاف ملے گا۔
