خانہ بدوشوں کو کشمیر جانے کی اجازت نہیں

موسم سرما میں جموں اور موسم گرما میں کشمیر نقل مکانی کرنے والے خانہ بدوشوں کو سرکاری اجازت نہ ملنے کے سبب مختلف مسائل کا سامنا ہے۔

ریاست جموں و کشمیر میں ہزاروں خانہ بدوش ضلع ترقیاتی کمشنر جموں کے دفتر کے باہر انتظار کر رہے ہیں، روزانہ سرکاری دفاتر کے چکر لگانے کے باوجود انہیں شام کے وقت خالی ہاتھ لوٹنا پڑرہا ہے۔

گجر طبقے کے نورالدین کا کہنا ہے کہ ہم رمضان میں روزے کی حالت دن بھر ڈی سی آفس کے باہر کھڑے رہتے ہیں لیکن ہمیں کشمیر جانے کے لیے اجازت نامہ نہیں ملتا، ہم نے کشمیر جانے کی پوری تیاری کرلی ہے، اور ٹرک ڈرائیورز کو بھی کرایہ وغیرہ دے دیا ہے۔

واضح رہے کشمیر کے یہ خانہ بدوش سردیوں میں جموں کا رخ کرتے ہیں اور گرمیوں کے موسم میں کشمیر واپس چلے جاتے ہیں۔

سرکاری حکم نامہ کے تحت، ان کو قومی شاہراہ پر چلنے کے لیے ایک اجازت نامہ ہونا چاہیے جو ان کو ہر سال ضلع ترقیاتی کمشنر کے دفاتر سے حاصل کرنا ہوتا ہے۔