کپواڑہ کا نوجوان حزب المجاہدین میں شامل

ریاست جموں و کشمیر کے ضلع کپواڑہ کے نوجوان کی ایک تصویر سوشل میڈیا پر ہتھیار سمیت وائرل ہوئی ہے۔

نوجوان کی شناخت کپواڑہ کے گلگام گاؤں کے رہنے والے امتیاز احمد میر کے طور پر ہوئی ہے۔

رپورٹز کے مطابق امتیاز احمد گزشتہ ایک ہفتے سے لاپتہ ہے۔سوشل میڈیا پر امتیاز کی تصویر گشت کر رہی ہے ۔ ایسا مانا جارہا ہے کہ امتیاز احمد نے عسکریت پسندوں کے صفوں میں شمولیت اختیار کی ہے۔ تصویر پر شدت پسند تنظیم حزب المجاہدین کی مہر لگی ہوئی ہےجس میں اننت ناگ اور کپواڑہ کے ڈسٹرکٹ کمانڈر محمد اشرف خان عرف منصور الحق کا نام لکھا گیا ہے۔ اشرف خان سرکردہ حریت کانفرنس لیڈر اشرف صحرائی کے بیٹے ہے جو گذشتہ برس عسکریت پسندوں کی صفوں میں شامل ہوگئے تھے۔

امتیاز کے اہل خانہ نے ان کی بازیابی کے بارے میں عوام سے مدد طلب کی تھی۔ مقامی ذرائع کے مطابق لاپتہ ہونے سے قبل وہ کپواڑہ بازار میں فوٹو اسٹیٹ کی دوکان چلاتے تھے۔

تاہم پولیس نے اس معاملے میں تحقیقات شروع کر دی ہے۔