نریندر مودی کی حلف برداری تقریب کی تیاریاں مکمل

نامزد وزیراعظم نریندر مودی کے دوسری مرتبہ وزیراعظم کے عہدہ کا حلف لینے کی تقریب کی تیاریاں مکمل کرلی گئی ہیں اور سب سے پہلے مہمان کے طورپر بنگلہ دیش کے صدر محمد عبدالحمید بدھ کی شام یہاں پہنچے۔

سختی حفاظتی انتظامات کے درمیان راشٹرپتی بھون کے احاطہ میں جمعرات کی شام کو سات بجے حلف بردار ی کی تقریب شروع ہوگی جس میں مودی کے ساتھ 50سے زائد وزرا کے حلف لینے کا امکان ہے۔ صدر رام ناتھ کووند وزیراعظم اور کابینہ کے اراکین کو حلف دلائیں گے۔

حلف برداری کی تقریب میں مختلف سیاسی جماعتوں کے رہنما، وزرائے اعلی، گورنروں کے ساتھ ساتھ مختلف علاقوں کی اہم ہستیوں اور کئی غیرملکی مہمانوں کو دعوت نامہ بھیجا گیا ہے۔ مغربی بنگال میں سیاسی تشدد کے شکار بنے لوگوں کے اہل خانہ کوبھی حلف برداری کی تقریب میں مدعو کیا گیا ہے۔

ذرائع کے مطابق وزیراعظم کل حلف لینے سے پہلے راج گھاٹ جاکر مہاتما گاندھی کی سمادھی پر گلہائے عقیدت پیش کریں گے اور پھر سابق وزیراعظم اٹل بہاری واجپئی کی سمادھی پر بھی خراج عقیدت پیش کریں گے۔ وہ انڈیا گیٹ کے نزدیک واقع وار میموریل جاکر شہید فوجیوں کوبھی گلہائے عقیدت پیش کریں گے۔