وینزویلا کے سفارتخانے میں امریکی اہلکار داخل

امریکی حکام واشنگٹن میں واقع وینزویلا کے سفارت خانے میں داخل ہوگئے ہیں جہاں امریکی کارکنان کئی ہفتوں سے ڈٹے ہوئے ہیں۔

یہ کارکنان وینزویلا کے اپوزیشن لیڈر جوآن گوائیڈوکے حامیوں کو سفارت خانے کی عمارت پر قبضہ کرنے سے روک رہے ہیں۔

موصولہ اطلاعات کے مطابق بڑی تعداد میں صحافی اور سینکڑوں لوگ سفارت خانے کے باہر موجود ہیں۔ وینزویلا کے کچھ لوگ ہسپانوی گیت گا رہے ہیں۔

سفارت خانے کے اندر موجود امریکی اہلکار کارکنوں کو گرفتار کر سکتے ہیں۔ سفارت خانے کے اندر اور باہر بڑی تعداد میں پولیس فورس تعینات ہے اور صورت حال پرامن بتائی جارہی ہے۔

وینزویلا میں موجودہ صدر نکولس مادرو کے خلاف ہو رہے احتجاجی مظاہروں کو دیکھتے ہوئے امریکہ نے اس پر کئی پابندیوں کے علاوہ فوجی آپشن تلاش کرنا شروع کردیا ہے۔ قومی اسمبلی کے اسپیکر اور حزب اختلاف کے رہنما جوآن گوائیڈو نے 23 جنوری کو ان احتجاجی مظاہروں کی قیادت کرنے کے ساتھ ساتھ خود کو ملک کا عبوری صدر قرار دیا تھا۔