انٹرسپلیمنٹری امتحانات کے سوالیہ پرچے غائب

تلنگانہ انٹرمیڈیٹ امتحانات کے نتائج میں ہوئی بے ضابطگیوں کو عوام ابھی بھول بھی نہ پائے تھے کہ تلنگانہ بورڈ آف انٹرمیڈیٹ ایجوکیشن پھر ایک بار مشکل صورتحال سے دوچار ہوگیا ہے۔

اطلاعات کے مطابق ایڈوانس سپلیمنٹری امتحانات کے سوالیہ پرچے کے دوباکس جو ضلع ورنگل کے ملس کالونی پولیس اسٹیشن کے اسٹرانگ روم میں رکھے گئے تھے، غائب ہوگئے۔

پرچہ سوالات کو گزشتہ ہفتے ملس کالونی پولیس اسٹیشن منتقل کیا گیا تھا۔ عہدیداروں کے مطابق پرچہ سوالات کے دوباکس غائب ہیں۔ ایڈوانس سپلیمنٹری امتحانات کا آج سے آغاز ہوگیا۔

دوسری طرف سوالیہ پرچوں کی گمشدگی کے معاملے میں بورڈ آف انٹرمیڈیٹ نے وضاحت پیش کی ہے۔

بورڈ آف انٹرمیڈیٹ کے عہدیداروں نے امتحانی پرچہ جات کے گمشدہ ہونے پر رد عمل کااظہار کرتے ہوئے کہا کہ گمشدہ پیپرز کی جگہ نئے سوالیہ پرچے فراہم کیے جائیں گے۔

واضح رہے کہ انٹرسپلیمنٹری امتحانات شیڈول کے مطابق ہوں گے۔