مولانا اسرائیل ندوی کی علمی خدمات

ہریانہ کی مشہور علمی شخصیت مولانا اسرائیل ندوی کا انتقال ہوگیا

نماز جنازہ جھانڈہ (میوات) میں ادا کی گئی
جمیعت اہلحدیث ہریانہ کے سابق امیر مولانا اسرائیل ندوی کو منگل کی شام ان کے آبائی گاؤں رنیالہ خورد جھانڈا(میوات) میں ہزاروں نم آنکھوں نے سپرد خاک کر دیا۔

مولانا اسرائیل ندوی کی وصیت کے مطابق ان کا جنازہ چارپائی پر قبرستان لے جایا گیا۔ مولانا مرحوم کی وصیت کے مطابق نماز جنازہ شیخ صلاح الدین مقبول مدنی کی امامت میں ادا کی گئی۔ اور وصیت کے مطابق گاؤں کے ہی قبرستان میں مولانا مرحوم کی تدفین عمل میں آئی۔مولانا مرحوم کو ان کے دینی دعوتی تعلیمی وتربیتی تصنیفی اور طبی خدمات کے حوالے سے علاقے میں کافی شہرت حاصل ہے۔مولانا اسرائیل ندوی نے درجن بھر کتابیں تالیف کیں اور متعدد کتابوں پر تعلیقات و حواشی تحریرکیے۔ وہ جامعہ محمدیہ جھانڈا کے مہتمم و بانی بھی تھے۔

آپ کی تصنیفات میں تراجم علمائے اھل حدیث میوات، ایک مجلس کی تین طلاق، تحریک جہاد میں اہلحدیث اورعلمائے دیوبند کا کردار، تذکرۃ الامام سید نذیر حسین محدث دھلوی، اور التعلیقات السلفیہ علی جامع الترمذی وغیرہ اہم ہیں۔

مولانا اسرائیل ندوی کی وفات علم حدیث کے میدان میں عظیم خسارہ ہے۔
مولانا کےچار بیٹے اور تین بیٹیاں ہیں۔
ان کی نماز جنازہ میں ہزاروں دینی، سماجی اور سیاسی شخصیات نے شرکت کی۔ جن میں جامعہ اسلامیہ سنابل کے صدر مرکز مولانا محمد رحمانی مدنی، جمعیت اہل حدیث ہند کے امیر اصغر علی امام مہدی۔ سابق وزیر ٹرانسپورٹ آفتاب احمد، مولانا الیاس سلفی، ڈاکٹر عیسیٰ انیس جامعی، مولانا عبدالرحمن سلفی قابل ذکر ہیں۔