کار کھائی میں گرنے سے چار افراد ہلاک، پانچ زخمی

ریاست اتراکھنڈ کے ضلع دہرادون میں آج ایک بے قابو کار گہری کھائی میں گر گئی جس کی وجہ سے چار افراد کی موقع پر ہی موت ہوگئی۔

ہلاک ہونے والوں میں ایک جوڑا (شوہر، بیوی)،ماں اور بیٹی شامل ہے جبکہ تین بچوں سمیت پانچ افراد شدید زخمی ہوگئے۔

پولیس ترجمان نے بتایا کہ آج تھانہ مسوری کے حلقے میں کینپٹی روڈ پر ہوٹل وائلڈ فلاور ہاؤس کے پاس ایک کار بے قابو ہوکر 200 میٹر گہری کھائی میں گر گئی۔

اس وقت کار میں 9 افراد سوار تھے حادثے میں محمد ریحان (35)، عائشہ (20)، آسمین(30) اور علمہ(4) کی موقع پر ہی موت ہوگئی۔

پولیس اور بچاؤٹیم نے زخمیوں کو ایمبولنس سے مسوری کے سینٹ میری اسپتال میں داخل کرایا جہاں بعد میں انھیں دہرادون میں واقع میکس اسپتال بھیجا گیا۔

پولیس کے مطابق گاڑی کی رفتار تیز ہونے کی وجہ سے کار بے قابو ہوکر سڑک کنارے ڈیوائیڈر سے ٹکرا کر گہری کھائی میں گر گئی۔