رابرٹ واڈرا سے جمعرات کو پوچھ گچھ ہوگی

انفورسمنٹ ڈائرکٹوریٹ (ای ڈی) نے کانگریس کے جنرل سکریٹری پرینکا گاندھی کے شوہر رابرٹ واڈرا کو پوچھ گچھ کے لیے تازہ سمن جاری کیا ہے۔

ای ڈی نے واڈرا کو دہلی این سی آر، بیکانیر میں زمین معاملے اور بیرون ملک دیگر بے نامی جائداد کے سلسلے میں پوچھ گچھ کے لیے جمعرات کو بلایا ہے۔

ای ڈی کے ذرائع نے بتایا کہ دوبئی کے جمیريا میں 14 کروڑ کے ایک ولا اور لندن میں 26 کروڑ روپے کا ایک فلیٹ بے نامی جائیداد کے معاملے واڈرا سے پوچھ گچھ کے لیے تازہ سمن جاری کیا ہے۔ ای ڈی نے اس سے پہلے واڈرا کو آٹھ بار پوچھ گچھ کے لیے بلایا ہے۔

دہلی ہائی کورٹ نے واڈرا کو منی لانڈرنگ معاملے میں ملی پیشگی ضمانت کو ای ڈی کی جانب سے منسوخ کرانے کے مطالبے پر پیر کو نوٹس جاری کرکے ان سے 17 جولائی تک جواب طلب کیا تھا۔

ای ڈی نے تفتیش میں تعاون نہ کرنے کا الزام لگاتے ہوئے واڈرا کو حراست میں دیئےجانے کا مطالبہ کیا ہے۔ اس نے کہا کہ منی لانڈرنگ کیس کی مکمل سچائی کا پتہ لگانے کے لیے واڈرا سے پوچھ گچھ کرنا ضروری ہے۔