انتخابی ڈیوٹی میں تعینات ملازم کی دل کا دورہ پڑنے سے موت

ہماچل پردیش میں اتوار کو ہونے والے پارلیمانی انتخابات کے سلسلے میں ضلع کلو کے مانیکرن پولنگ ا سٹیشن نمبر -141 پر تعینات محکمہ تعمیرات عامہ کے ملازم لوترام کو دل کا دورہ پڑنے سے موت ہو گئی۔

ضلع کے اسسٹنٹ پولس سپرنٹنڈنٹ شالنی ملہوترا نے واقعہ کی تصدیق کرتے ہوئے بتایا کہ لوترام کو جمعہ کے روز پولنگ بوتھ پر پہنچتے ہی دل کا دورہ پڑنے پر فوری طور پر زری اسپتال پہنچایا گیا جہاں پر ڈاکٹروں نے انہیں مردہ قرار دیا۔ ڈاکٹروں نے بادی النظر میں موت کا سبب دل کا دورہ بتایا لیکن حقیقی وجوہات کا پتہ رپورٹ آنے پر لگے گا۔ پولس نے لاش کو پوسٹ مارٹم کے بعد اہل خانہ کو سونپ دیا۔