وینزویلا بحران: صدر کا تختہ اُلٹنے کی سازش

وینزویلا میں سیاسی بحران مزید شدت اختیار کرتا جارہا ہے اور اب صدر مدورو کا تختہ اُلٹنے کی سازش رچی جا رہی ہے۔

وینز ویلا کے دارالحکومت کراکس میں فوجی اڈے کے قریب حزب مخالف جماعتوں کے حامیوں اور فوج میں جھڑپیں ہوئیں جس کی وجہ سے 69 افراد زخمی ہو گئے ہیں۔

ایک جانب امریکی حمایت یافتہ اور خود ساختہ صدر خواں گوائیڈو نے فوج کی حمایت حاصل ہونے کا دعویٰ بھی کردیا۔

دوسری جانب برازیلین حکام نے کہا کہ وینزویلا کے بہت سے فوجیوں نے اس کے سفارت خانے میں پناہ لے لی جبکہ اسپین، میکسیکو اور کولمبیا میں وینزویلا کے سفارت خانوں کے باہر مدورو کے خلاف مظاہرے کیے گئے۔

امریکی صدر ڈونلڈ ٹرمپ نے کہا کہ امریکہ، وینزویلا کے عوام کی آزادی کی حمایت میں ان کے شانہ بشانہ ہے اور ٹرمپ نے کیوبا کو مدورو کی حمایت ترک نہ کرنے کی صورت میں کڑی پابندیوں کی دھمکی دے دی۔

واضح رہےکہ یورپی یونین نے وینزیلا کے معاملات کو سیاسی طور پر حل کرنے پر زور دیا ہے۔