برسات سے قبل ہی ارریہ میں سیلابی صورتحال

سب سے برا حال ضلع کلکٹریٹ کا ہے جہاں ہلکی سی بارش سے ضلع کلکٹریٹ جھیل میں تبدیل ہو گیا ہے۔

ابھی مانسون کی آمد بھی نہیں ہوئی اور ارریہ شہر میں ہلکی سی بارش سے جگہ جگہ پانی جمع ہو گیا ہے۔

شہر کے متعدد علاقوں میں بارش کا پانی جم گیا ہے جس سے آنے جانے والے مسافر، اسکولی طلباء و رہائشی لوگوں کو پریشانیوں کا سامنا ہے۔

شہر کے آشرم محلہ، اسلام نگر، مولوی ٹولہ، اے ڈی بی چوک کے علاوہ درجنوں علاقوں میں بارش کا پانی جم گیا ہے، جس کے نکاسی کا کوئی راستہ نہیں ہے۔

سب سے برا حال ضلع کلکٹریٹ کا ہے جہاں ہلکی سی بارش سے ضلع کلکٹریٹ جھیل میں تبدیل ہو گیا ہے۔ کلکٹریٹ میں روزانہ ہزاروں کی تعداد میں لوگوں کی آمدورفت ہوتی ہے۔

اب پانی جمع ہونے کی وجہ سے یہاں آنے جانے والوں کو دشواریوں کا سامنا کرنا پڑ رہا ہے۔

مقامی لوگوں کا کہنا ہے کہ ضلع کلکٹریٹ شہر کا مرکز ہے یہاں تمام بڑے افسران کا آنا جانا لگا رہتا ہے جب یہاں کی صورت حال یہ ہے تو شہر کے دوسرے علاقوں کا کیا حال ہوگا۔
کلکٹریٹ کے مختلف مقامات پر جیسے اقلیتی بلاک، انومنڈل بلاک، سبھا بھون، ڈی پی آر او وغیرہ کے پاس پانی لگا ہے۔

وہیں دوسری جانب نگر پریشد کے چیئرمین رتیش رائے کا کہنا ہے کہ ان کی کوشش ہے کہ برسات کے موسم سے قبل پوری تیاری کر لی جائے گی، تاکہ اس وقت عوام کو پریشانی نہ ہو، ابھی کچھ علاقوں میں پانی کی نکاسی کا مسئلہ سامنے آیا ہے جسے درست کر لیا جائے گا۔