سوپور بس اسٹینڈ میں تعمیراتی کام کا آغاز

سوپور بس اسٹینڈ میں میگڈم بچھانے کا کام اگلے مہینے سے شروع کیا جائے گا۔ آج یہاں پر گڑھے بھرنے کا کام کیا جارہا ہے۔ اس کے ساتھ ڈرینیج سسٹم بھی تعمیر کیا جائے گا۔

شمالی کشمیر کے ضلع بارہمولہ کے سوپور بس اسٹینڈ کے تاجروں اور ڈرائیوروں نے ای ٹی بھارت کے ساتھ بات کرتے ہوئے بتایا کہ ای ٹی وی چینل کا ہم تہہ دل سے شکریہ ادا کرتے ہیں جنہوں نے لگاتار ہمارے اس جائز مطالبے کو ارباب اقتدار تک پہنچانے کیلئے ایک اہم رول نبھایا۔

معمولی بارش کی وجہ سے بس اسٹینڈ سوپور سمندر کی شکل اختیار کرلیتا تھا جس سے یہاں کی تاجر برادری کے ساتھ ساتھ راہگیروں کو بھی چلنے پھرنے میں کافی مشکلات پیش آتی تھیں لیکن آج بس اسٹینڈ سوپور میں تعمیر و مرمت کا آغاز ہوگیا ہے اور انتظامیہ نے باضابطہ طور پر کام شروع کردیا ہے۔

انہوں نے مزید بتایا کہ محکمہ آر اینڈ بی نے ہمارے ساتھ جو وعدے کئے تھے ان کو اب عملی جامہ پہنانے کے لیے حتمی شکل دیدی گئی ہے اور بس اسٹینڈ کے اندر ایک مکمل ڈرینیج سسٹم کی تعمیر کا بھی آغاز ہوگیا ہے۔ اس سے بس اسٹینڈ کے اندر پانی جمع نہیں ہوگا۔

محکمہ آر اینڈ بی کے ایک اعلی افسر نے ای ٹی وی بھارت کو فون پر کہا کہ پورے بس اسٹینڈ پر اگلے مہینے مکمل طور پر میگڈم بچھانے کا کام شروع کیا جائے گا اور ساتھ ساتھ پانی کی نکاسی کے لیے ایک ڈرینیج سسٹم بھی تیار کیا جائے گا۔