مغربی بنگال کے گورنر جگدیپ دھنکر نے ٹویٹ کرتے ہوئے لکھا ہے کہ مغربی بنگال ہی واحد ریاست ہے جہاں انتخابات کے بعد خون خرابہ کا سلسلہ شروع ہوتا ہے۔ انہوں نے کہا کہ انتخابات میں کسی کی جیت ہوتی ہے تو کسی کو شکست کا سامنا کرنا پڑتا ہے اور نتائج کے بعد ہی انتخابی سرگرمیاں ختم ہو جاتی ہیں۔
گورنر جگدیپ دھنکر نے اپنے ٹویٹ میں لکھا ہے کہ جمہوری ملک میں انتخابات کے بعد سیاسی انتقام کے لئے کوئی جگہ نہیں ہے. سیاسی انتقام جمہوریت کو نقصان پہنچا سکتا ہے۔ یہ مہذب معاشرہ کے لیے بھی صحیح صورتِ حال نہیں ہے۔
مغربی بنگال پولیس، کولکاتا پولیس اور ریاستی سکیورٹی مشیر کو ٹیگ کرتے ہوئے انہوں نے لکھا ہے کہ ریاست کے تمام اضلاع میں سیاسی جماعتوں کے حامیوں کے درمیان خونی جھڑپوں کا سلسلہ جاری ہے اور چند لوگ ہاتھوں پہ ہاتھ دھرے بیٹھے ہوئے ہیں. ایسا نہیں چلےگا. آپ لوگوں کو سخت کارروائی کرنی ہوگی ورنہ اس کا جواب دینے کے لئے تیار رہیں۔
انہوں نے کہا کہ مجھے سمجھ میں نہیں آرہا ہے کہ پولیس انتظامیہ اور ریاستی سکیورٹی مشیر کیا کر رہے ہیں. انتخابات ختم ہو چکے ہیں. سیاسی انتقام کے نام پر جس طرح سے لوگوں کا قتل کیا جا رہا ہے. اس کی مذمت کرنی چاہئے۔
واضح رہے کہ مغربی بنگال اسمبلی انتخابات 2021 کے نتائج کے اعلان کے بعد سے ریاست میں سیاسی جھڑپوں کا سلسلہ جاری ہے. جس میں گزشتہ 36 گھنٹوں کے دوران 12 لوگ ہلاک ہو چکے ہیں۔ اور اس میں اکثریت بی جے پی حامیوں کی ہی ہے۔