پوکھرا: نیپال میں طیارہ حادثے سے قبل کی ایک مبینہ ویڈیو سوشل میڈیا پر وائرل ہو رہا ہے، جس ویڈیو کے بارے میں یہ کہا جارہا ہے کہ یہ ایک فیس بک لائیو ویڈیو ہے، جس کو غازی پور کے ایک نوجوان جو خود اس طیارے میں سوار تھا فلائٹ کے لینڈنگ کے وقت فیس بک لائیو کر رہا تھا کہ اچانک جہاز کریش ہو جاتا ہے۔
ویڈیو میں پہلے فلائٹ کے باہر کا منظر دکھایا جاتا ہے، پھر اندر کا منظر، اس وقت طیارے میں تمام مسافر خوش دکھائی دے رہے تھے۔ پھر طیارہ ہوا میں غوطہ لگانے لگتا ہے۔ جس سے چیخ و پکار کی آواز بھی سنی جاسکتی ہے اور پھر اچانک آگ کے شعلے نمودار ہونے لگتے ہیں اور طیارہ گر کر تباہ ہو جاتا ہے۔
سونو جیسوال بظاہر وہ مسافر تھا جس نے ویڈیو شوٹ کیا تھا، مبینہ ویڈیو میں جیسوال کے ساتھ ساتھ جہاز میں موجود دیگر مسافروں کے شاٹس بھی دکھائے گئے ہیں۔ حادثے کا شکار طیارہ میں پانچ بھارتیوں سمیت 72 مسافر تھے۔ جائے حادثہ سے اب تک کل 68 لاشیں نکالی جا چکی ہیں۔