ہندی بولنے والے تمل ناڈو میں بیت الخلا صاف کرتے ہیں: ڈی ایم کے ایم پی کا توہین آمیز بیان، تیجسوی یادو کا جواب

Bihar People Clean Toilets تیجسوی یادو نے کہا کہ دیگر ریاستوں کے لیڈروں کو اس طرح کے تبصرے کرنے سے گریز کرنا چاہیے۔ انہوں نے کہا کہ بہار اور یوپی کے مزدوروں کی دوسری ریاستوں میں بہت زیادہ مانگ ہے اور اگر وہ کام کرنا چھوڑ دیتے ہیں تو وہاں رہنے والے لوگوں کی زندگیاں ٹھپ ہو جائیں گی۔

پٹنہ: بہار کے نائب وزیراعلیٰ تیجسوی یادو نے ڈی ایم کے ایم پی دیاندھی مارن کے مبینہ متنازعہ ویڈیو کی مذمت کی ہے۔ جس ویڈیو میں دیاندھی مارن نے مبینہ طور پر کہا کہ ہندی اسٹیٹ کے لوگ تمل ناڈو میں بیت الخلا صاف کرتے ہیں اور دیگر معمولی کام کرتے ہیں۔ تیجسوی یادو نے کہا کہ اس بیان کی مذمت کی جانی چاہئے اور کسی بھی لیڈر کو ایسے بیانات نہیں دینا چاہئے جس سے دوسری ریاستوں کے لوگوں کی توہین ہو۔ بہار اور یوپی کے لوگوں کے بارے میں ایسی باتیں کہنا بہت غلط ہے۔

انھوں یہ بھی کہا کہ ڈی ایم کے ایم پی کو ذہن میں رکھنا چاہئے کہ یہ ملک ایک ہے اور کوئی بھی کہیں بھی جا کر کام کر سکتا ہے۔ جس طرح ہم دوسری ریاستوں کے لوگوں کا احترام کرتے ہیں، ہم بھی اسی کی توقع رکھتے ہیں۔ ہم سب کو ایک دوسرے کا احترام کرنا چاہئے۔

تجسوی یادو نے مزید کہا کہ کرونا ندھی جی کی پارٹی ڈی ایم کے سماجی انصاف پر یقین رکھتی ہے۔ لیکن کروناندھی جی کی پارٹی کے لیڈر کا بہار اور یوپی کے لوگوں کے بارے میں توہین آمیز بات کرنا غیر مناسب ہے۔ ہم اس کی حمایت نہیں کرتے۔ پورے ملک میں بہار اور یوپی کے مزدوروں کی مانگ ہے۔ اگر یہی لوگ دوسری ریاستوں میں کام پر نہیں جائیں گے تو ان ریاستوں کے لوگوں کی زندگیاں ٹھپ ہو جائے گی، تمام لیڈوروں کو اس حقیقت کا ادراک ہونا چاہیے۔

انہوں نے کہا کہ اگر ڈی ایم کے لیڈر نے ذات پات کی عدم مساوات کی نشاندہی کی ہوتی یا اس بات کا ذکر کیا ہوتا کہ ایک خاص سماجی گروپ کے لوگ معمولی ملازمتوں میں مشغول ہوتے ہیں تو یہ سمجھ میں آتا۔ لیکن، ڈی ایم کے ایم پی نے خاص طور پر بہار اور یوپی کے لوگوں کا ذکر کیا جو کہ بہت بدقسمتی کی بات ہے۔

واضح رہے کہ سوشل میڈیا پر سامنے آنے والی ایک ویڈیو میں، ڈی ایم کے ایم پی دیاندھی مارن ہندی بولنے والے لوگوں کی ملازمت کے امکانات کا موازنہ انگریزی کی تعلیم حاصل کرنے والوں سے کرتے ہوئے نظر آ رہے ہیں۔ انہوں نے کہا کہ جو لوگ انگریزی پڑھتے ہیں وہ آئی ٹی فرموں میں اچھی تنخواہوں پر کام کرتے ہیں جب کہ بہار میں ہندی پڑھنے والے صرف تمل ناڈو میں گھر ، سڑکیں بناتے اور بیت الخلا صاف کرتے ہیں۔ تاہم ای ٹی وی بھارت اس ویڈیو کی تصدیق نہیں کرتا ہے۔

قابل ذکر بات یہ ہے کہ ڈی ایم کے صدر اور تمل ناڈو کے وزیراعلیٰ ایم کے اسٹالن کے لالو پرساد یادو کے خاندان کے ساتھ بہت ہی خوشگوار تعلقات ہیں۔ جب پٹنہ میں انڈیا بلاک کی پہلی میٹنگ ہوئی تو اسٹالن ان سے ملنے رابڑی دیوی کی رہائش گاہ پر گئے۔ اس سے قبل نائب سی ایم تجسوی یادو نے تمل ناڈو میں 'کروناندھی کوٹم' کے افتتاح میں بطور مہمان شرکت کی تھی۔

مارن کے اس مبینہ ویڈیو پر تنازعہ انڈیا اتحاد کے لیے پریشانی کا باعث بن سکتا ہے، جس میں آر جے ڈی اور ڈی ایم کے دونوں اتحادی ہیں۔ دریں اثنا، بی جے پی لیڈر امت مالویہ نے مارن کے اس ویڈیو کو اپنے ایکس ہینڈل پر شیئر کرکے راہل گاندھی اور نتیش کمار سے بھی وضاحت طلب کی ہے۔