کانگریس کسانوں کے نام پر ڈرامہ کر رہی: محسن رضا

کانگریس کسانوں کے نام پر ڈرامہ کر رہی ہے، آج ملک کے کسان وزیر اعظم نریندر مودی کی قیادت میں ترقی کر رہے اور اُن کی آمدنی میں اضافہ ہو رہا ہے۔

اُترپردیش حکومت میں وزیر برائے اقلیتی بہبود محسن رضا نے کانگریس پر شدید نکتہ چینی کرتے ہوئے کہا ہے کہ کانگریس کسانوں کے نام پر ڈرامہ کررہی ہے، محسن رضا نے کہا کہ کانگریس 'جے جوان جے کسان' کا نعرہ بلند کر کے کسانوں کو گمراہ کرنا چاہتی ہے۔ وہ بھی پرینکا گاندھی کی قیادت میں، جن کے شوہر پر کسانوں کی زمین ہتھیانے کا الزام ہے۔'

انہوں نے کہا کہ آزادی کے بعد سے ہی کانگریس نے کسانوں کو خودکشی کے لیے مجبور کیا، انہوں نے کہا کہ 'پہلے کسان خودکشی کے واقعات بہت ہوتے تھے لیکن آج وہی لوگ کسانوں کے ہم درد بنے ہوئے ہیں۔'

ریاستی وزیر محسن رضا نے کہا کہ کسان آندولن کے ذریعے کانگریس رابرٹ واڈرا کو بچانا چاہتی ہے۔ ملک کے کسان وزیر اعظم نریندر مودی کی قیادت میں خوش ہیں اور ترقی کر رہے ہیں۔