شملہ: ہماچل میں مانسون کی مسلسل بارش سے متاثرہ اضلاع میں اسکول بند کردیے گئے ہیں۔ اس کے علاوہ سڑکوں پر گاڑیوں کی آمد و رفت بھی بند کر دی گئی ہے۔ اسی کے ساتھ بجلی و پانی کی سپلائی بھی ٹھپ ہو گئی ہے۔ Monsoon 2022
شملہ، منڈی، کانگڑا، کلو اور سولن اضلاع سے بارش سے ہونے والی تباہی کی خوفناک تصویریں سامنے آئی ہیں۔ گزشتہ رات ٹھیوگ میں پٹرول پمپ پر بھاری چٹانیں آنے سے پمپ سمیت چار گاڑیاں زدمیں آکر تباہ ہوگئی ہیں۔ منڈی میں دیر رات سے ہونے والی موسلادھار بارش سے ضلع میں بھاری نقصان کی بھی اطلاعات ہیں۔ سب ڈویژن گوہر کے پنچایت کاشن کے گاؤں جڈون میں رات گئے ایک پہاڑی دھنسنے سے ایک ہی خاندان کے سات افراد دب گئے۔ وزیر اعلیٰ کے آبائی ضلع تھوناگ میں بھی بارشوں نے بڑی تباہی مچائی ہے۔ ملبہ لوگوں کے گھروں اور دکانوں میں داخل ہو گیا ہے۔
کانگڑا میں بھی موسلادھار بارش کی وجہ سے ندی نالے میں طغیانی آگئی ہے۔ پٹھان کوٹ اور ہماچل کو ملانے والی ٹرین کا چکی پل بھی ٹوٹ گیا ہے۔ ریلوے نے پہلے ہی اس پر ٹرینوں کی آمدورفت روک دی تھی۔ ابھی پولیس کنٹرول روم سے اطلاع ملی ہے کہ منڈی کلو وایا کٹولہ-کٹنڈی سڑک گوڈا فارم (کماند) کے قریب لینڈ سلائیڈنگ کی وجہ سے بند ہو گئی ہے اور گاڑیوں کی آمدورفت رک گئی ہے۔
پولیس کنٹرول روم سے اطلاع ملی ہے کہ نیشنل ہائی وے-21 پنڈوہ کے قریب لینڈ سلائیڈنگ کی وجہ سے بند ہو گیا ہے۔ سندوہ پرانہ کٹولہ محمد حسین کا پورا خاندان سیلاب کی زدمیں آنے سے لاپتہ ہے اوعر تلاش جاری ہے۔ گھر سے تقریباً آدھا کلومیٹر نیچے ایک لاش ملی ہے، اس کی شناخت کی جارہی ہے۔ مقامی افراد خاندان کے باقی افراد کی تلاش کر رہے ہیں۔