اسمبلی کی رکنیت سے استعفیٰ کے لیے تیار ہوں: ای راجندر

اراضیات پر غیر مجاز قبضوں کے الزامات پر کابینہ سے برطرف تلنگانہ کی حکمران جماعت ٹی آر ایس کے سینئر لیڈر ای راجندر نے دعویٰ کیا ہے کہ وہ اسمبلی کی رکنیت سے استعفیٰ کے لئے تیار ہیں۔

سابق وزیر صحت ای راجندر نے میڈیا سے بات کرتے ہوئے کہا کہ ٹی آر ایس کے نام پر انتخابات میں کامیابی کی بات کی جاتی ہے تو وہ اس کی رکنیت سے مستعفی ہوجائیں گے۔ انہوں نے اعلان کیا کہ وہ حضور آباد کے ان عوام کے ساتھ تبادلہ خیال کے بعد ہی اپنے مستقبل کے لائحہ عمل کا اعلان کریں گے۔ جنہوں نے ان کی تقریباً 19 برس حمایت کی تھی۔

سابق وزیر نے کہا کہ وزیراعلیٰ کے چندر شیکھر راؤ کو یہ سمجھنا چاہئے کہ انسانی اقدار اہم ہیں۔ انہوں نے مزید کہا کہ وہ ان کے خلاف عائد کردہ فرضی معاملات پر گرفتاری سے بھی خوفزدہ نہیں ہیں۔ راجندر نے کہا کہ جب گینگسٹر نعیم نے ان کو دھمکایا تھا تو اُس وقت بھی وہ خوفزدہ نہیں ہوئے۔ نعیم نے ان کو جان سے مارنے کی دھمکی دی تھی۔ انہوں نے واضح کیا کہ ریاستی حکومت ان پر اراضیات پر غیر مجاز قبضوں کا جھوٹا پروپگنڈہ کررہی ہے۔

ای راجندر نے کہا کہ ”میں نے چندر شیکھر راؤ کے ساتھ تقریباً 19 برس کام کیا اور اس عرصہ کے دوران پارٹی کو نیچا دکھانے کے لئے میں نے کچھ بھی نہیں کیا۔ وزیراعلیٰ نے مجھے وزیر بننے کا موقع دیا اور پارٹی کو بدنام کرنے کے لئے میں نے کچھ بھی غلط نہیں کیا۔ میرے خلاف منصوبہ بند طریقہ سے سازش کی گئی ہے۔ میرے جیسے عام آدمی کے خلاف چندر شیکھر راؤ نے طاقت کا استعمال کیا۔

انہوں نے کہا کہ میرے خلاف افواہیں پھیلائی جارہی ہیں۔ میرے خلاف عائد کردہ الزامات کی وضاحت کا بھی موقع مجھے نہیں دیا گیا۔ عہدیداروں نے میرے خلاف جو رپورٹ پیش کی ہے اس میں تمام الزامات جھوٹ ہیں“۔ ریاست میں نئی سیاسی جماعت کے قیام سے متعلق پوچھے گئے سوال کا جواب دیتے ہوئے انہوں نے کہا کہ فی الحال ان کا ایسا کوئی ارادہ نہیں ہے۔