پنجاب کی کانگریس حکومت بجلی کے نرخوں میں کمی کا لالچ دے رہی :چڈھا

عام آدمی پارٹی کے پنجاب کے شریک انچارج راگھو چڈھا نے کانگریس پارٹی پر زبردست حملہ بولتے ہوئے کہا کہ انتخابات میں پانچ مہینے باقی ہیں، پنجاب حکومت بجلی کی قیمت میں کمی کرکے لوگوں کو لالچ دے رہی ہے۔

نئی دہلی: راگھو چڑھا نے کہا کہ اگر حکومت واقعی بجلی کی شرح کم کرنا چاہتی ہے تو جہاں جہاں کانگریس کی حکومت ہے، ان ریاستوں میں بھی بجلی کی قیمتوں میں کمی کرے۔ ورنہ آنے والے انتخابات میں عوام ان کو سبق سکھانے والی ہے اور پنجاب میں مکمل اکثریت کے ساتھ عام آدمی پارٹی کی حکومت بننے جا رہی ہے۔

راگھو نے کہا کہ پنجاب میں بدعنوان کانگریس حکومت نے ساڑھے چار سال تک کچھ نہیں کیا۔ جب عام آدمی پارٹی کے کنوینر اور دہلی کے وزیر اعلیٰ اروند کیجریوال نے پنجاب میں حکومت بننے پر 300 یونٹ بجلی مفت فراہم کرنے کی گارنٹی دی ،جس کے بعد پنجاب حکومت حرکت میں آئی اور پانچ ماہ کے لیے بجلی کے نرخوں میں کمی کر رہی ہے۔ انہوں نے کہا کہ پنجاب کے عوام جھوٹ اور دکھاوے کے جھانسے میں آنے والے نہیں ہیں۔ ساتھ ہی امید ظاہر کی کہ آنے والے اسمبلی انتخابات میں پنجاب میں عام آدمی پارٹی کی حکومت مکمل اکثریت کے ساتھ بننے والی ہے۔

اس دوران انہوں نے کہا کہ اگر کانگریس کو واقعی بجلی کی قیمتوں کی فکر ہے تو اسے ہر اس ریاست میں جہاں کانگریس کی حکومت ہے بجلی کے نرخوں میں راحت دینی چاہئے۔ انہوں نے یہ بھی کہا کہ حکومت میں آتے ہی پنجاب حکومت نے جو بھی وعدے کیے، چاہے وہ کسانوں کے قرضے معاف کرنے کے ہوں یا نوجوانوں کو روزگار دینے کے، پنجاب حکومت ہر وعدے میں ناکام رہی ہے۔ پنجاب میں جب انتخابات میں چند روز باقی رہ گئے ہیں تو عوام کی آنکھوں میں دھول جھونکنے کا کام کیا جا رہا ہے۔