نئی دہلی: قومی دارالحکومت دہلی میں ہولی کے موقع پر تیز ساؤنڈ کے ساتھ ڈی جے بجانا ایک نوجوان کو مہنگا پڑ گیا۔ دراصل پولیس کو تیز ساؤنڈ میں ڈی جے بجانے کی اطلاع ملی تھی، جس کے بعد پولیس موقع پر پہنچی اور ملزم نوجوان سے مبینہ طور پر ہاتھا پائی کی اور پھر معاملہ اتنا بڑھ گیا کہ اس کے بعد پولیس ملزم نوجوان کو سرعام مار پیٹ کر لے گئی۔ اس واقع کا ویڈیو وہاں موجود کسی نے بنا کر سوشل میڈیا پر اپ لوڈ کر دیا، جو کافی وائرل ہو رہا ہے۔ ویڈیو میں واضح طور پر دیکھا جا سکتا ہے کہ کئی پولیس اہلکار ایک نوجوان کو لٹکا کر لے جا رہے ہیں اور اس کی پٹائی بھی کر رہے ہیں۔ معلومات کے مطابق یہ ویڈیو جنوب مشرقی ضلع کے کالندی کنج تھانہ علاقے کا بتایا جا رہا ہے۔
آپ کو بتادیں کہ ہولی کے موقع پر پوری دہلی میں سیکورٹی کے وسیع انتظامات کیے گئے تھے اور پولیس نے پرامن طریقے سے ہولی منانے کی اپیل کی تھی۔ دوسری جانب ہولی کے موقع پر شرپسند کو نشے میں دھت ہو کر ہنگامہ آرائی کرنے سے روکنے کے لیے پولیس کی جانب سے تمام انتظامات کیے گئے تھے۔ ملک بھر میں ہولی کا تہوار جوش و خروش سے منایا گیا۔ درحقیقت گزشتہ تین سالوں سے کورونا وبا کی وجہ سے ہولی کا تہوار بے رونق تھا اور لوگ اپنی خواہش کے مطابق ہولی نہیں کھیل پا رہے تھے لیکن اس بار صورتحال معمول پر ہے اس لیے لوگوں میں اس حوالے سے کافی جوش و خروش دیکھا گیا۔