نئی دہلی: عام آدمی پارٹی کے قومی کنوینر اور دہلی کے وزیر اعلی اروند کیجریوال نے کہا کہ 'گجرات کے لوگوں نے عام آدمی پارٹی کو قومی پارٹی بنا دیا ہے۔ اروند کیجریوال نے "عآپ" کو قومی پارٹی کا درجہ ملنے پر تمام حامیوں اور ہم وطنوں کو مبارکباد دی اور کہا کہ عام آدمی پارٹی آج قومی پارٹی بن گئی ہے۔ آج گجرات انتخابات کے نتائج آ گئے ہیں اور گجرات کے عوام نے عام آدمی پارٹی کو قومی پارٹی بنا دیا ہے۔ گجرات میں عام آدمی پارٹی کو جتنے ووٹ ملے ہیں، اس کے مطابق عام آدمی پارٹی اب قانونی طور پر قومی پارٹی بن چکی ہے۔ یہ بہت بڑی بات ہے۔ ملک میں چند جماعتیں ہیں، جنہیں قومی جماعت کا درجہ حاصل ہے۔ اب آپ کی عام آدمی پارٹی بھی ان چند پارٹیوں میں شامل ہو گئی ہے۔ عام آدمی پارٹی صرف 10 سال پہلے بنی تھی۔ ایک چھوٹی پارٹی، ایک نوجوان پارٹی، جس کی عمر صرف 10 سال ہے ۔ ایک طرح سے آپ سب لوگوں کی کافی حیرت انگیز کامیابی ہے۔ AAP Total votes Percentage in Gujarat election
انہوں نے کہا کہ وہ انتخابات کے دوران جتنی بار گجرات آئے، آپ کی طرف سے جو محبت، عزت اور اعتماد ملا اس کا میں زندگی بھر شکر گزار رہوں گا۔ ایک طرح سے گجرات کو بی جے پی کا گڑھ سمجھا جاتا ہے۔ ہم اس قلعے کو توڑنے میں کامیاب ہو گئے۔ آج ہمیں تقریباً 13 فیصد ووٹ ملے ہیں اور آپ سب کے آشیرواد سے اگلی بار ہم سب مل کر اس قلعہ کو جیتنے میں کامیاب ہوں گے۔ہم نے پوری مہم بہت مثبت انداز میں چلائی۔ کسی نے گالی نہیں دی، ہم نے گندی زبان استعمال نہیں کی، کسی کے خلاف بات نہیں کی۔ اب تک 75 سال سے اس ملک میں گالی ، لڑائی جھگڑے اور ذات پات کی سیاست چلتی تھی۔ پہلی بار کوئی ایسی جماعت آئی ہے جو عوامی مسائل پر بات کرتی ہے۔ ملک کو نمبر ون بنانے کی بات کرتی ہے ۔