عوام جھوٹے وعدے اور جملہ بازی سے تنگ آ چکے ہیں: شہاب الدین

اترپردیس میں کانگریس متبادل کے نعرہ کے ساتھ 29 ستمبر کو میرٹھ میں بڑی ریلی کا انعقاد کیا جارہا ہے، جس میں پرینکا گاندھی انتخابی اعلانات کریں گی۔ ساتھ ہی کانگریس اپنی طاقت کا بھی مظاہرہ کریں گی۔

کانگریس کا دعویٰ ہے کہ یہ ایک تاریخی ریلی ہوگی جو یقینی طور پر سیاست کا رخ بدلنے کا سبب بنے گی۔ یہ ریلی میرٹھ میں منعقد ہوگی لیکن اس کی تیاری نوئیڈا میں عروج پر ہے۔

کانگریسی کارکنان اور ذمہ داران اپنی اپنی استعداد کے مطابق ریلی کو کامیاب بنانے کے لیے تیاری کر رہے ہیں۔

نوئیڈا مہا نگر کانگریس کے صدر شہاب الدین نے ای ٹی وی بھارت کے نمائندے کے ساتھ خصوصی بات چیت میں کہا کہ اس بار میرٹھ میں عوامی سیلاب امڈے گا کیونکہ عوام کئی برسوں سے مسلسل جھوٹے وعدوں اور جملے بازی سے تنگ آ چکی ہے اور وہ حقیقت کو کینوس پر اترتے دیکھنا چاہتی ہے۔ جسے کانگریس ہی پر کر سکتی ہے۔

انہوں نے کہا کہ میرٹھ کی مہا ریلی سے انتخابی سمت طے ہوگی۔ پرینکا گاندھی میرٹھ کی انقلابی سرزمین سے انتخابی بگل بجائیں گی۔

شہاب الدین نے کہا کہ کانگریس نے جو بھی وعدے کیے اس کو پورے کیے اس کا تابناک ماضی سب کے سامنے ہے لیکن موجودہ حکومت جملے تک محدود رہی، سماج کا ہر طبقہ پریشان ہے اب اسے متبادل صرف کانگریس ہی نظر آتی ہے۔

سٹی صدر شہاب الدین نے کہا کہ کانگریس کے پاس واپسی کا بہترین موقع ہے۔ تنظیمی سطح پرکانگریس کافی مضبوط ہے اور اس کے تمام عہدے داران مضبوطی سے اپنی ذمہ داریوں کو نبھا رہے ہیں۔

شہاب الدین نے کہا کہ نوئیڈا سے عوامی سیلاب میرٹھ کے لیے روانہ ہوگا۔ یہ کانگریس کے لئے انتہائی کامیاب ریلیوں میں سے ایک ہوگی۔

شہاب الدین نے کہا کہ مجھے امید ہے کہ یہ ریلی اتر پردیش کی سیاست اور کانگریس کی سمت بھی طے کرے گی۔