قومی پرچم کی بے حرمتی سے پورا ملک دکھی ہوا ہے: مودی

وزیراعظم نریندر مودی نے اپنے ماہانہ ریڈیو پروگرام 'من کی بات' میں کہا کہ 26 جنوری کو دہلی میں ترنگے کی بے حرمتی سے پورا ملک بہت دُکھی ہوا ہے۔'

نریندر مودی نے 'من کی بات' پروگرام میں یوم جمہوریہ پر قومی دارالحکومت دہلی میں کسانوں کی ٹریکٹر ریلی کے دوران لال قلعہ واقعہ کا ذکر کرتے ہوئے کہا کہ 'قومی پرچم ترنگا کی بے حرمتی سے بے حد دُکھی ہوں۔'

واضح رہے کہ زرعی قوانین کے خلاف دہلی میں ٹریکٹر ریلی کے دوران کسانوں کا ایک گروپ مبینہ طور پر لال قلعے میں داخل ہوا تھا جس سے کافی ہلچل مچ گئی تھی اور اس گروپ نے مبینہ طور پر جس جگہ ترنگا پرچم لہرایا جاتا ہے اسی جگہ پر اپنا پرچم لہرایا تھا۔

بشکریہ ٹویٹر

اس کے علاوہ نریندر مودی نے بھارتی کرکٹ ٹیم کی بھی تعریف کی جس نے آسٹریلیا کرکٹ ٹیم کو اُسی کی سرزمین پر شکست دے کر تاریخی جیت درج کی تھی۔

وزیراعظم نے کہا کہ ماہ جنوری میں ہمیں کرکٹ پِچ سے بھی خوشخبری ملی جب بھارتی کرکٹ ٹیم نے شروعاتی دقتوں کے بعد شاندار کاکردگی کا مظاہرہ کرتے ہوئے آسٹریلیا کو شکست دی۔