حیدرآباد: آصف جاہ ثامن نواب میر برکت علی خاں مکرم جاہ بہادر کو آج بادیدہ نم ہزاروں سوگواروں کی موجودگی میں شہرحیدرآباد کی تاریخی مکہ مسجد میں واقع مقابر آصفیہ میں ان کے والد پرنس آف برار نواب میرحمایت علی خان اعظم جاہ بہادر کی قبرکے پہلو میں سپرد لحد کردیاگیا۔ ان کی نماز جنازہ اسی مسجد میں بعد عصراداکی گئی جس میں عوام کی بڑی تعداد کے ساتھ ساتھ آصف جاہی خاندان کے افراد، مختلف ٹرسٹوں کے ذمہ داروں اور اہم شخصیات نے شرکت کی اوران کی خدمات کو خراج پیش کیا۔
قبل ازیں مکرم جاہ بہادرکی میت کو عوام کے آخری دیدار کے لئے بدھ کی صبح رکھاگیا، جبکہ کل شام اہم شخصیات نے چومحلہ پیلیس پہنچ کر ان کی میت کا آخری دیدار کیا اور انہیں بھرپور خراج عقیدت پیش کیا۔ دربار ہال کے ایک حصہ میں آصف جاہ ثامن کی مغفرت کے لئے مسلسل قرآن خوانی کا اہتمام کیاگیا جہاں پر مرد و خواتین قرآن خوانی میں مصروف تھے۔ بعدنماز ظہر غسل اور تجہیز و تکفین انجام دی گئی۔ دربار ہال کے بازو کھلی جگہ پر غسل اور تجہیز و تکفین کے انتظامات کئے گئے تھے۔
میت پر بصد احترام پرچم آصفی رکھاگیا تھا۔پولیس کے دستہ نے سلامی بھی دی۔3.30بجے سہ پہر چومحلہ پیالیس سے جلوس جنازہ کی روانگی عمل میں آئی۔ ان کا جنازہ مکہ مسجد لے جایاگیا۔ ہزاروں افراد کے ہجوم کے پیش نظر نماز جنازہ مکہ مسجد کے اندرونی حصہ میں منبر کے قریب ادا کی گئی۔شام چار بجے تک مکہ مسجد کی ابتدائی پانچ صفیں مکمل ہوگئی تھیں۔