کورونا وائرس کے تعلق سے منموہن سنگھ نے نریندر مودی لکھے گئے خط میں کہا کہ اس وبا کو کنٹرول کرنے کے لیے ٹیکہ کاری مہم میں تیزی لانا ضروری ہے۔
ڈاکٹر منموہن سنگھ نے خط میں کہا کہ کورونا وائرس کی دوسری لہر زیادہ خطرناک ہے اس لیے اس سے نمٹنے کے لیے ٹیکہ کاری مہم کو تیز کرنے کی ضرورت ہے۔
انہوں نے اس سلسلہ میں نریندر مودی کو مشورہ دیا کہ حکومت کو ٹیکہ کاری میں تیزی لانے کے ساتھ ہی ویکسین کی کمی کو دور کرنے کے اقدامات بھی کرنے چاہئیں۔
منموہن سنگھ نے خط میں لکھا کہ 'کورونا ویکسین کی پیداوار بڑھانے کے ساتھ ساتھ پورے ملک میں شفاف طریقہ سے ان کی تقسیم کا انتظام بھی کیا جانا چاہئے اور ویکسی نیشن کے لیے مقررہ عمر کی حد میں نرمی دینے کا بندوبست کرنا چاہیے۔
انہوں نے کہا کہ استاد، بس ڈرائیورز، آٹو ڈرائیورز، ٹیکسی ڈرائیورز، میونسپل کارپوریشن اور گرام پنچایتوں میں کام کرنے والے ملازمین اور وکیل وغیرہ عام لوگوں کے رابطہ میں زیادہ رہتے ہیں اس لیے ان پیشوں سے منسلک 45 برس سے کم عمر کے لوگوں کو کورونا ٹیکہ لگایا جانا چاہیے۔
سابق وزیراعظم نے مزید کہا کہ حکومت کی پالیسیوں کی وجہ سے بھارت آج پوری دنیا میں ویکسین کی تیاری کا سب سے بڑا مرکز بنا ہوا ہے۔ انہوں نے کہا کہ ویکسین کی تیاری کا کام زیادہ ہو اس لیے اس کے مزید لائسنس دیئے جانے چاہئیں اور لائسنس دینے کے عمل کی سختی سے پیروی کی جانی چاہئے۔