آکسیجن کی کمی، ایئر فورس نے سنبھالا محاذ

ملک میں کورونا وائرس کے بڑھتے کیسز کے تناظر میں آکسیجن کی کمی کو پورا کرنے کے لیے چلائی گئی مختلف مہم میں ایئر فورس نے بھی محاذ سنبھال لیا اور آکسیجن کی فراہمی میں تعاون کے لیے اس کے طیارے اور ہیلی کاپٹرز نے اندرون و بیرون ملک بہت سی پروازیں کیں۔

ایئر فورس کا سی 17 طیارہ 2 بجے ہنڈن ایئر بیس سے سنگاپور کے چنگی انٹرنیشنل ایئرپورٹ کے لیے روانہ ہوا۔ طیارہ صبح ساڑھے آٹھ بجے سنگاپور پہنچا۔ چار خالی کرائیوجنک آکسیجن کنٹینرز لوڈ کرنے کے بعد یہ طیارہ پانا گڑھ ایئر بیس کے لیے نکلا۔

اس کے علاوہ ایک دیگر سی 17 طیارہ ہنڈن ایئر بیس سے صبح 8 بجے پونے ایئر بیس کے لیے روانہ ہوا تھا جہاں سے دو خالی کرایوجنک آکسیجن کنٹینر ٹرک جہاز پر لادے گئے تھے جو بعد میں جام نگر ایئر بیس کے لیے اڑ گئے۔ اس سے قبل ایک اور سی 17 طیارہ کے ذریعے دن کے اوائل میں جودھپور سے دو خالی کنٹینرز جام نگر پہچائے گئے تھے۔

ایک چنوک ہیلی کاپٹر اور این 32 فوجی ٹرانسپورٹ طیارے نے کووڈ ٹیسٹ کا سامان بالترتیب جموں سے لیہہ اور جموں سے کرگل پہنچایا۔ آلات میں بائیو سیفٹی کیبینٹ، سینٹرفیوجس اور اسٹیبلائزر شامل تھے۔ یہ مشینیں سائنسی اور صنعتی تحقیقاتی کونسل (سی ایس آئی آر) نے بنائی ہیں اور اب وہ جانچ کی گنجائش کو بڑھانے کے لیے مرکز کے زیر انتظام علاقہ لداخ کو دی گئی ہیں۔