دہلی: قصاب پورہ علاقے کی خستہ حالت، بنیادی سہولیات کا فقدان

قصاب پورہ علاقے میں پینے کے پانی کی عدم دستیابی ہے گھروں میں سرکاری پانی کی فراہمی نہیں ہونے کی وجہ سے لوگوں کو سیور کا گندہ پانی پینا پڑتا ہے، جس سے بچوں کے بیمار ہونے کا خدشہ رہتا ہے۔

دارالحکومت دہلی کے قصاب پورہ علاقے، جہاں زمین کی قیمت تو کروڑوں میں ہے لیکن مقامی لوگوں کے لیے بنیادی سہولیات کا فقدان ہے۔ علاقے میں پینے کے پانی کی عدم دستیابی ہے۔ گھروں میں سرکاری پانی کی فراہمی نہیں ہونے کی وجہ سے لوگوں کو سیور کا گندہ پانی پینا پڑتا ہے جس سے بچوں کے بیمار ہونے کا خدشہ رہتا ہے۔

اس سے متعلق مقامی رکن اسمبلی عمران حسین جو دہلی سرکار میں وزیر بھی ہیں انہیں بھی متعدد بار اس پریشانی سے آگاہ کرایا گیا، لیکن اس کے باوجود اسے حل نہیں کیا گیا۔

علاقے کی سڑکیں جگہ جگہ سے کھدی ہوئی ہیں نہ گلیوں کی مرمت کی جاتی ہے اور نہ ہی سڑکوں کے گڈے بھرے جاتے ہیں البتہ آئے دن گڈھوں سے بزرگوں کے گرنے کے واقعات پیش آتے رہتے ہیں۔

علاقے میں صاف صفائی کا تو کہنا ہی کیا، ہر گلی کے نکڑ پر کوڑے کا ڈھیر نظر آتا ہے۔ مقامی افراد کے مطابق علاقے میں صفائی کا کوئی سسٹم ہی نہیں ہے۔

لوگوں کا کہنا ہے کہ ریاست اور مرکز دونوں ہی سوچھ بھارت ابھییان کی بات کرتی ہے لیکن مسلم علاقوں کی صورتحال حکومت کی اس مہم سے بالکل مختلف ہے۔

لوگوں کا کہنا ہے کہ گذشتہ 7 سالوں میں علاقے میں جتنی گندگی ہوئی ہے اس سے قبل کبھی نہیں ہوئی۔ شکایت کرتے ہیں تو کام نہیں ہوتا جبکہ اس سے قبل کانگریس کی حکومت میں ایسا نہیں تھا۔

کہنے کو مقامی ایم ایل اے خود ریاستی وزیر ہیں لیکن علاقے کی خستہ حالی دیکھ کر تو یہی محسوس ہوتا ہے کہ وہ چاہتے ہی نہیں کہ علاقے میں ترقی ہو اس سے متعلق ای ٹی وی بھارت کے نمائندے نے عمران حسین سے بات کرنے کی بھی کوشش کی لیکن انہوں نے فون ہی نہیں اٹھایا۔