Karnataka BJP Chief on Tipu Sultan کرناٹک میں بی جے پی سربراہ کی اشتعال انگیزی، ٹیپو سلطان کے حامیوں کو زندہ نہیں رہنا چاہیے

کرناٹک میں بھارتیہ جنتا پارٹی کے سربراہ نلین کمار کتیل نے ایک عوامی جلسے سے اشتعال انگیز تقریر کرتے ہوئے کہا کہ ٹیپو سلطان کی اولادوں کو جنگلوں میں بھیج دینا چاہیے۔ اس مہینے کے شروع میں کتیل نے یہ دعویٰ کیا تھا کہ ریاست میں آئندہ اسمبلی انتخابات ٹیپو بمقابلہ ساورکر پر لڑے جائیں گے۔ رواں سال اپریل-مئی میں کرناٹک میں اسمبلی انتخابات ہونے ہیں۔

بنگلورو: کرناٹک میں بھارتیہ جنتا پارٹی کے سربراہ نلین کمار کتیل نے ایک دفعہ پھر میسور کے 18ویں صدی کے حکمران ٹیپو سلطان کے بارے میں اشتعال انگیز تبصرہ کیا ہے۔ بی جے پی رہنما نے بدھ کو ایک عوامی جلسے میں کہا کہ ٹیپو سلطان کے تمام پرجوش حامیوں کو زندہ نہیں رہنا چاہیے بلکہ ٹیپو سلطان کی اولادوں کو بھگا کر جنگلوں میں بھیج دینا چاہیے۔ نلین کمار کتیل نے جلسہ عام کے دوران مزید کہا کہ ہم بھگوان رام اور ہنومان کے بھکت ہیں، ہم ٹیپو سلطان کی اولاد نہیں ہیں۔ ہم نے ٹیپو کی اولاد کو واپس بھیج دیا ہے تو میں یلابرگہ کے لوگوں سے پوچھتا ہوں، کیا وہ ہنومان کی پوجا کریں گے یا ٹیپو سلطان کے بھجن گائیں گے؟

کتیل نے کہا، 'ریاست کے لوگوں کو سوچنا چاہیے کہ وہ بھگوان رام اور ہنومان کے بھکتوں کو چاہتے ہیں یا ٹیپو کی اولادوں کو۔ میں بھگوان ہنومان کی سرزمین سے چیلنج کرتا ہوں کہ ٹیپو سے محبت کرنے والوں کو یہاں نہیں رہنا چاہئے۔ جو بھگوان رام کے بھجن گاتے ہیں اور بھگوان ہنومان کے حامی ہیں انہیں صرف یہاں رہنا چاہئے۔

اس سے قبل بھی کرناٹک میں بی جے پی کے سربراہ ٹیپو سلطان کو لے کرکے متنازع بیان دے چکے ہیں ، اس مہینے کے شروع میں کتیل نے یہ دعویٰ کیا تھا کہ ریاست میں آئندہ اسمبلی انتخابات ٹیپو بمقابلہ ساورکر پر لڑے جائیں گے۔ قابل ذکر ہے کہ میسور کے حکمران ٹیپو سلطان کا مسئلہ کرناٹک کی سیاست میں ایک پولرائزنگ کا اہم عنصر بن گیا ہے۔ ٹیپو سلطان بمقابلہ ہنومان کی بحث یوپی کے وزیر اعلی یوگی آدتیہ ناتھ نے 2018 کے کرناٹک انتخابات میں شروع کی تھی۔ بتادیں کہ اس سال اپریل-مئی میں کرناٹک میں 224 اسمبلی سیٹوں کے لیے انتخابات ہونے ہیں۔