دہلی:جمعیت علمائے ہند کے صدر مولانا محمود اسعد مدنی نے بی جے پی رکن اسمبلی ٹی راجہ سنگھ کی پی ڈی ایکٹ کے تحت دوبارہ گرفتاری کو امن و امان کے لحاظ سے ضروری کارروائی قرار دیتے ہوئے کہا کہ اس طرح کے مجرموں کو ملک کبھی معاف نہیں کرے گا۔ واضح رہے کہ پی ڈی ایکٹ ایک ایسا قانون ہے، جو پولیس کے ذریعے عادی بدنام زمانہ اور معاشرے کے لئے خطرناک مجرموں کو ایک سال کی مدت کے لئے جیل میں بند رکھنے کے لیے استعمال کیا جاتا ہے۔ اس ایکٹ کے تحت گرفتاری کو لے کر جمیعت علماء آندھرپردیش اور تلنگانہ کی کئی یونٹس نے 12 مقامات پر کلیکٹر سے ملاقات کرکے میمورنڈم دیا اور ٹی راجہ سنگھ کے خلاف آٹھ مقامات پر ایف آئی آر درج کرائی۔Jamiat Ulema Hind on T Raja Singh
اس سلسلے میں جمعیت علماء اے پی و تلنگانہ کے صدر مولانا حافظ پیر شبیر احمد و ناظم اعلی حافظ پیر خلیق صابر نے بتایا کہ جس دن سے ٹی راجہ نے قابل اعتراض تبصرہ کیا ہے، جمعیت علماء کے کارکنان نے مختلف اضلاع کے ذمہ داروں سے مل کر میمورنڈم دیا، جس میں پی ڈی ایکٹ کے تحت کارروائی کا مطالبہ سرفہرست تھا۔ ساتھ ہی ریاستی جمیعت علماء نے وزیراعلی کے سی آر اور ریاستی وزیر داخلہ کو خط لکھ کر تحسین پونہ والا کیس میں سپریم کورٹ کی ہدایات کے مطابق ریاست میں ایسا قانون بنانے کا مطالبہ کیا ہے جس کے تحت نفرت انگیز تقاریر کے مجرموں کو سخت سزا ملے۔