کرناٹک کے سابق وزیر اے کے عبدالصمد کا انتقال

اے کے عبدالصمد نے ڈی دیوراج عرس کی حکومت میں صحت اور خاندانی منصوبہ بندی کے وزیر کی حیثیت سے خدمات انجام دیں۔ ان کے دور اقتدار کی مدت کو ریاست میں یونانی کی ترقی کا سنہرا دور مانا جاتا ہے، انہیں کے دور میں یونانی گریجویٹ کے روشن مستقبل کے پیش نظر بنگلور کے لیے نیشنل انسٹی ٹیوٹ آف یونانی میڈیسن الاٹ کیا گیا تھا۔

کرناٹک کے سابق وزیر برائے صحت و خاندانی منصوبہ بندی اے کے عبدالصمد منگل کی صبح بنگلور میں واقع اپنی رہائش گاہ پر 87 برس کی عمر میں انتقال کرگئے۔ پیشے سے تاجر اے کے عبدالصمد کانگریس پارٹی سے جڑے رہے سنہ 1978 میں وہ رام نگر حلقہ سے رکن اسمبلی کے لیے منتخب ہوئے تھے۔

اس کے بعد انہوں نے ڈی دیوراج عرس کی حکومت میں صحت اور خاندانی منصوبہ بندی کے وزیر کی حیثیت سے خدمات انجام دیں۔ ان کے دور اقتدار کی مدت کو ریاست میں یونانی کی ترقی کا 'سنہرا دور'مانا جاتا ہے، انہیں کے دور میں یونانی گریجویٹس کے روشن مستقبل کے پیش نظر بنگلور کے لئے معزز نیشنل انسٹی ٹیوٹ آف یونانی میڈیسن الاٹ کیا گیا تھا۔

رام نگر میں واقع گورنمنٹ فرسٹ گریڈ کالج شروع کرانے میں بھی اے کے عبدالصمد نے اہم کردار نبھایا تھا، جسے سید حاجی منیر نے شروع کیا تھا۔ عبدالصمد کی موت پر کرناٹک کانگریس کے صدر ڈی کے شیو کمار نے افسوس کا اظہارِ کیا اور تعزیت پیش کی۔

ڈی کے شیو کمار نے کہا کہ 'عبدالصمد ایک سینیئر رہنما تھے، ان کے انتقال کی خبر سن کر ہمیں کافی دکھ ہوا۔ انہوں نے کہا کہ 'مرحوم عبد الصمد نے اپنے دور میں بہترین عوامی خدمات انجام دی تھیں'۔