Farmers Protest Update: کسان تحریک کے سات ماہ، کسانوں نے گورنرس کو میمورنڈم سونپا

ٹکیت نے کہا کہ گزشتہ دنوں وزیر زراعت نریندر سنگھ تومر کو کاشتکاروں کی تنظیموں کے ساتھ غیر مشروط مذاکرات کے حوالے سے خط لکھا گیا تھا، لیکن ان کا جواب ابھی تک نہیں آیا ہے۔

زراعتی اصلاحات کے نئے قوانین کے خلاف جاری کسان تحریک کے سات ماہ مکمل ہونے پر کسان تنظیموں نے آج ملک بھر میں گورنر ہاؤس کے نزدیک دھرنا مظاہرہ کیا اور گورنروں کو میمورنڈم پیش کیا۔

بھارتیہ کسان یونین کے لیڈر راکیش ٹکیت نے غازي پور بارڈر میں کسانوں کی تحریک کے مقام پر صحافیوں سے گفتگو کرتے ہوئے کہا 'جوائنٹ کسان مورچہ نے کسان مخالف تینوں قوانین کو واپس لینے اور فصلوں کی کم از کم امدادی قیمت (ایم ایس پی) سے متعلق ایک قانون نافذ کرنے کے مطالبے پر آج تمام ریاستوں کے گورنر ہاؤس کے نزدیک مظاہرہ کیا اور گورنرس کو میمورنڈم پیش کیا'۔

ٹکیت نے کہا 'گزشتہ دنوں وزیر زراعت نریندر سنگھ تومر کو کاشتکاروں کی تنظیموں کے ساتھ غیر مشروط مذاکرات کے حوالے سے خط لکھا گیا تھا، لیکن ان کا جواب ابھی تک نہیں آیا ہے'۔

انہوں نے کہا 'ملک کے کسان سات ماہ سے احتجاج کر رہے ہیں، حکومت سن نہیں رہی ہے۔ کسان کمزور نہیں ہیں۔ جب تک حکومت ان کا مطالبہ قبول نہیں کرتی، اس وقت تک یہ احتجاج جاری رہے گا'۔

دریں اثناء، وزیر زراعت نریندر سنگھ تومر نے ٹویٹ کیا 'میں تمام کسان یونین کے لوگوں سے کہنا چاہتا ہوں کہ وہ اپنا احتجاج ختم کریں۔ حکومت قانون کے کسی بھی دفعہ پر بات چیت کرنے اور ان کے ازالے کے لیے بھی تیار ہے'۔