میرٹھ کے پسماندہ علاقوں میں تعلیمی ادارے مشکل حالات میں

کورونا وبا کے سبب گزشتہ ایک سال سے درہم برہم اسکول اور کالج کے تعلیمی نظام کے اس سال پٹری پر لوٹنے کی اُمید کی جا رہی تھی لیکن نئے تعلیمی سیشن کی شروعات سے قبل ہی ایک بار پھر کورونا کی تیسری لہر کے خطرے نے اسکولوں کے لیے مشکل حالات پیدا کر دیے ہیں۔ نئے تعلیمی سیشن سے بچوں کے اسکول لوٹنے کی اُمید کر رہے پرائیویٹ اسکولوں اور بالخصوص پچھڑے علاقوں کے چھوٹے چھوٹے پرائیویٹ تعلیمی اداروں کے سامنے وجود اور روزگار کے ختم ہونے کا خطرہ پیدا ہو گیا ہے۔

ملک کی سب سے بڑی آبادی والے صوبے اُتر پردیش میں ہزاروں پرائیویٹ تعلیمی ادارے اُن علاقوں میں تعلیمی ضرورت کو پورا کرنے کا کام کر رہے ہیں جہاں سرکاری اداروں کا یا تو وجود میں ہی نہیں ہے یہ پھر تعداد بہت کم ہے۔

غریب پچھڑی آبادی والے علاقوں میں معمولی فیس کی بنیاد پر تعلیمی خدمات انجام دے رہے یہ ادارے لاک ڈاؤن کے بعد سے مالی بحران کا شکار رہےاور اب یہ حکومت سے امداد کی گہار لگا رہے ہیں۔

اکیلے میرٹھ شہر کے مختلف علاقوں میں ایسے اسکولوں کی تعداد سینکڑوں میں ہے جن میں ہزاروں بچے تعلیم اور ہزاروں افراد روزگار حاصل کرتے ہیں۔ ایسے میں ضرورت ہے حکومت کو ان نجی تعلیمی اداروں کے وجود کو بچانے کے لیے آگے آئیں، جس سے بچے تعلیم سے محروم نہیں ہوں۔