ریاست اترا کھنڈ کے چمولی میں واقع تپوون سرنگ سے مزید چھ لاشیں برآمد ہوئی ہیں، رینی گاؤں میں رشی گنگا پن بجلی منصوبے کے ملبے سے سات لاشیں برآمد ہوئی تھیں، جبکہ 153 افراد تا حال لا پتہ بتائے جا رہے ہیں۔
واضح رہے کہ سات فروری کو چمولی میں ہوئی تباہی میں لاپتہ افراد کی تلاشی مہم نویں روز بھی جاری رہی، ریسکیو آپریشن ٹیم کو اب تک کل 51 لاشیں برآمد ہو چکی ہیں، اتوار کے روز تپوون سرنگ سےمزید چھ لاشیں برآمد ہوئی ہیں۔
یاد رہے کہ سات فروری کو رشی گنگا میں پہاڑ سے لاکھوں میٹرک ٹن برف گرنے کے باعث رشی گنگا اور دھولی گنگا ندیوں میں اچانک سیلاب سے 13.2 میگاواٹ کا رشی گنگا پن بجلی پروجیکٹ مکمل طور پر تباہ ہوگیا تھا، جبکہ 520 میگاواٹ کے تپوون وشنوگاڈ منصوبے کو شدید نقصان پہنچا۔ اور اس کی سرنگ میں کام کرنے والے لوگ وہاں پھنس گئے تھے۔
مرکزی و ریاستوں حکومتوں نے فوری طور پر کئی ایجنسیوں کو وہاں راحت و بچاؤ کے کاموں کے لیے وہاں بھیجا جس کے بعد اب تک راحت کاری کا کام وہاں جاری ہے۔
