آٹھ حکومتی وزراء نے پریس کانفرنس میں بتایا کہ اپوزیشن پارٹی کے ارکان کارروائی کے خوف سے مارشلز سے جھگڑا اور ہاتھا پائی کے جھوٹے الزامات لگا رہے ہیں اور ملک کو گمراہ کرنا چاہتے ہیں۔
انہوں نے کہا کہ اپوزیشن پہلے دن سے ہی پارلیمنٹ کی کارروائی نہیں چلنے دینا چاہتی تھی، خاص طور پر راجیہ سبھا میں۔ وہ کافی جارحانہ تھے اور انہوں نے اس دوران چیئرمین پر بے بنیاد الزامات لگائے۔
وزراء نے چیئرمین پر زور دیا ہے کہ وہ ایوان میں 4، 9 اور 11 اگست کے واقعات کی خصوصی کمیٹی سے انکوائری کرائے اور قصوروار ارکان کے خلاف سخت کارروائی کرے تاکہ مستقبل میں ایسے واقعات دوبارہ نہ ہوں۔
اس پریس کانفرنس میں راجیہ سبھا میں بی جے پی کے ہاؤس لیڈر اور وزیر تجارت و صنعت پیوش گوئل، ڈپٹی لیڈر اور اقلیتی امور کے وزیر مختارعباس نقوی، پارلیمانی امور کے وزیر پرہلاد جوشی، وزیر اطلاعات و نشریات انوراگ ٹھاکر، وزیر محنت بھوپندر یادو، وزیر تعلیم دھرمیندر پردھان اور پارلیمانی امور کے وزیر مملکت وی مرلی دھرن اور ارجن رام میگھوال موجود تھے۔