پنجاب میں این آئی اے کو ملی بڑی کامیابی

این آئی اے نے شری اکال تخت صاحب کے سابق جھتے دار بھائی جسبیر سنگھ روڈے کے گھر چھاپہ ماری کی۔چھاپہ ماری کے دوران روڈے کے گھر سے دھماکہ خیز مادہ برآمد کیا گیا ہے۔

قومی تفتیشی ایجنسی (این آئی اے) نے جمعرات کی دیر رات شری اکال تخت صاحب کے سابق جھتے دار بھائی جسبیر سنگھ روڈے کے گھر چھاپہ ماری کرکے ان کے بیٹے گرمُکھ سنگھ کو گرفتار کیا ہے۔ چھاپے کے دوران روڈے کے گھر سے دھماکہ خیز مادہ برآمد ہوا ہے۔

ذرائع کے مطابق این آئی اے اور آئی بی نے مشترکہ طور پر یہ چھاپہ ماری جمعرات کی رات 12 بجے کی گئی۔ بھائی جسبیر سنگھ روڈے کے اہل خانہ کے اراکین نے اس بات کی تصدیق کی ہے کہ رات 12 بجے ان کے اربن ایسٹیٹ کے ہردیال نگر واقع گھر میں پہنچی۔ 25-30 رکنی ٹیم بھائی روڈے کے بیٹے گُرمکھ سنگھ کو گرفتار کرکے لے گئی ہے۔

چھاپہ ماری کے وقت بھائی روڈے اپنے گھر میں ہی تھے لیکن ان کی طبیعت ٹھیک نہ ہونے کے سبب پولیس نے ان کے بیٹے کو گرفتار کیا ہے ۔ بھائی روڈے کا کچھ وقت پہلے آپریشن ہوا ہے۔ متذکرہ کاروائی کو گذشتہ دنوں پنجاب میں ہوئی ٹیفن بم برآمدگی کے معاملے سے جوڑ کر دیکھا جا رہا ہے اور یہ کاروائی اسی سلسلے میں کی گئی ہے۔

قابل ذکر ہے کہ کچھ دن پہلے امرتسر گاؤں کے ڈالیکے میں پاکستان کی جانب سے ڈرون کے ذریعے پھینکے گئے ہتھیاروں میں ایک ٹیفن بم اور کچھ دیگر دھماکہ خیز مادہ برآمد کیا گیا تھا۔ اس کی تفتیش وزارت داخلہ کے حکم پر این آئی اے نے اپنے ہاتھوں میں لے لی ہے۔

اس معاملے میں بھائی روڈے کے پاکستان میں رہنے والے بھائی لکھبیر سنگھ روڈے کو بھی ملوث سمجھا جا رہا ہے۔ بھائی لکھبیر سنگھ روڈے انٹرنیشنل سکھ یوتھ فیڈریشن کا سربراہ ہے اور اس وقت پاکستان میں مقیم ہے۔ ایسے الزامات ہیں کہ لکھبیر سنگھ روڈے پاکستان کی طرف سے دھماکہ خیز مادے کی سپلائی کر رہا تھا جبکہ گرمکھ سنگھ روڈے اس سپلائی کو ادھر ہینڈل کر رہا تھا۔ اس بات کی ابھی تک کوئی سرکاری طور پر توثیق نہیں ہوئی ہے۔

یو این آئی