جموں و کشمیر کے ضلع بانہال سے بارہمولہ کے درمیان چلنے والی ریل سروسز تقریبا ایک سال سے بند پڑی ہے۔ اب تک اسے دوبارہ بحال نہیں کیا گیا ہے۔ ریلوے اتھارٹی کی جانب سے ریلوے پٹری سے برف ہٹانے کا کام جاری ہے، عام لوگوں نے مطالبہ کیا ہے کہ 'ریل خدمات کو دوبارہ جلد از جلد بحال کیا جائے۔'
کورونا وائرس کے پھیلاﺅ کے بعد ملک بھر کے ساتھ ساتھ جموں کشمیر میں بھی لاک ڈاﺅن نافذ کیا گیا تھا جس کے ساتھ ہی تمام تجارتی و کاروباری سرگرمیاں بند ہوگئیں جبکہ ٹرانسپورٹ بھی کئی ماہ تک بند ہونے کے ساتھ ساتھ ریل سروس بھی احتیاط کے بطور بند کردی گئی۔
اگرچہ بعد میں کورونا وائرس کے کیسوں میں کمی آنے کے بعد تمام تر سرگرمیاں دوبارہ بحال ہوئیں، تاہم ریل خدمات ابھی تک بحالی کی منتظر ہے۔ ایک سال پورا ہونے کے بعد بھی ابھی تک بانہال سے بارہمولہ کے درمیان چلنے والی ریل خدمات کی بحالی کا کوئی امکان نظر نہیں آرہا ہے جس کے نتیجے میں مسافروں میں ناراضگی پائی جا رہی ہے۔
مسافروں کا کہنا ہے کہ ریل خدمات سے ایک تو ان کا سفر آسان ہو گیا تھا جبکہ ساتھ ہی کم کرایہ میں وقت پر اپنی منزلوں پر پہنچتے تھے۔ تاہم ریل خدما ت گزشتہ ایک برس سے بند رہنے کے باعث ان کو کافی پریشانیوں کا سامنا ہے اور انہیں اپنی مقررہ منزلوں پر پہنچنے میں کافی دیر ہو جاتی ہے۔ جبکہ اس کے علاوہ اضافی کرایہ بھی ان کے لئے درد سر بن چکا ہے۔
انہوں نے گورنر انتظامیہ کو تنقید کا نشانہ بناتے ہوئے کہا کہ 'جب جموں کشمیر میں تمام شعبوں کو دوبارہ بحال کیا جا چکا ہے تو کن وجوہات کی بنا پر ریل سروسز بحال نہیں کی گئی ہے۔'