بہار: پولیس انکاؤنٹر میں 3 ہلاک

ریاست بہار کے ضلع ویشالی کے بہلول پور علاقے میں پولیس اور ایس ٹی ایف کے مشترکہ آپریشن میں ایک بین ریاستی گروہ کے تین ارکان ہلاک ہوگئے جبکہ تین لوگوں نے خود سپردگی کی۔

پولیس کو خفیہ اطلاع ملی تھی کہ اس علاقے میں کچھ جرائم پیشہ افراد روپوش ہیں، پولیس اور اے ٹی ایف نے اس علاقے کو محاصرہ میں لے لیا، اس دوران بدمعاشوں نے فائرنگ شروع کردی۔ کہا جارہا ہے کہ دونوں طرف سے تقریباً 500 راؤنڈ فائرنگ ہوئی۔ آخر کار پولیس نے انکاؤنٹر میں تین لوگوں کو مارگرایا۔

پولیس سپریڈنٹنٹ مانو جیت سنگھ ڈھلو نے کہا کہ اس گروہ کا سرغنہ منیش سنگھ رادھے پور دیارا کا رہنے والا تھا۔ اس کے ساتھی امام مظفر پور کے منیہاری اور عبدالامان سمتی پور کا رہنے والا تھا۔ تینوں پولیس انکاؤنٹر میں مارے گئے ہیں۔ ان کے پاس سے دو اے کے 47 اور دو غیر ملکی پستول سمیت میگزین اور گولیاں برآمدکی گئی ہیں۔

وہیں گرفتار تینوں ملزمین سے پولیس سختی سے پوچھ گچھ کررہی ہے۔
ایم ایس ڈھلو نے کہا کہ ہمیں اس علاقے میں بدمعاشوں کے چھپے ہونے کی اطلاع موصول ہوئی تھی جس کے بعد ہم نے کارروائی کی۔